Җиңүчеләр буыны турында конкрет кайгырту кирәк

Рус Акташы авыл җирлегендә Бөек Җиңүнең 70 еллыгына әзерлек кысаларында авыл җирлекләре ветераннар советы рәисләренең семинар-киңәшмәсе булды, анда авыл башлыклары һәм авыллардан район советына сайланган депутатлар чакырылган иде. Семинар эшендә район башлыгы Мәҗит Салихов, шәрәфле кунак – Советлар Союзы Герое Борис Кузнецов, республика ветераннар советы рәисенең беренче урынбасары Ефим Вайнер катнашты.

Үзенең сәламләү сүзендә район башлыгы тантаналы чарага яхшылап әзерләнү һәм аны лаеклы үткәрү зарурлыгын ассызыклады. “Бер генә ветеран да, аларның бер генә проблемасы да – беренче карашка бик кечкенә булып күренгәне дә безнең игътибардан читтә калырга тиеш түгел”, - диде Мәҗит Салихов. Ул ватан сакчылары истәлегенә куелган обелискларны, һәйкәлләрне яңарткан өчен нефтьчеләргә, төзүчеләргә, оешмаларга рәхмәт сүзләре адреслады. Тыл хезмәтчәннәренә, толларга һәм сугыш балаларына обелисклар кую эшен дәвам итәргә чакырды.

Ветеран оешмаларының Бөек Ватан сугышында җиңүнең 70 еллыгына әзерләнү һәм аны үткәрү буенча бурычлары турында шәһәр ветераннар советы рәисе Васыйл Хуҗәхмәтов доклад ясады.

Советлар Союзы Герое Борис Кузнецов чыгышын игътибар белән тыңладылар. “Без көчле Ватаныбызның чәчәк атуы өчен бөек эш эшләдек”, - диде Герой. “Сугышчан туганлык” җәмәгать оешмасы рәисе, ӘМР ветераннар советы президиумы әгъзасы Геннадий Денисовның да чыгышы истә калырлык булды.

Республика ветераннар советы рәисенең беренче урынбасары Ефим Вайнерның йомгаклау чыгышында тормышның барлык өлкәләрендә киртәсез мохит булдыру, һәр ветеранның актив тормыш позициясе, ветеран оешмалары, профсоюзлар, яшьләрнең өч яклы катнашлык белән эшли торган системасы зарур булу чагылыш тапты. Һәр ветеранга тиешле игътибар булдыруда уңышлы эшнең ачкычы шунда.