Советлар Союзы Герое Борис Кузнецовның батырлык дәресе

9 декабрьдә үткәрелә торган Ватан геройлары көне алдыннан Рус Акташы урта мәктәбенең Сугышчан дан музеенда Советлар Союзы Герое Борис Кузнецовның өлкән сыйныф укучылары белән очрашуы булды.

Укучылар Геройга 1941-1945 еллардагы сугыш сәхифәләрен ни дәрәҗәдә белүләрен, озак эзләнүләр нәтиҗәсендә җыелган экспонатларны: якташларының каберләреннән алып кайткан туфракларны, солдат хатларын, солдат котелогын, олылар белән бергәләп эшләнгән фотоларны, сугыш елъязмасы сәхифәләрен күрсәттеләр.

Герой укучыларны спортны яратырга (ул үзе сугышка кадәр җиңел атлетика, штанга, бокс белән шөгыльләнгән), Ватанны саклауга әзер булырга чакырды.

Борис Кузнецов 1925 ел ахырында Казанда туган. 6 сыйныф укыганнан соң һөнәр училищесында укып чыккан, токарь булып эшләгән. Бөек Ватан сугышында 1943 елның гыйнварыннан катнашкан, үзе әйтүенчә, “Блокададагы Ленинградта чын җәһәннәмне” күргән, үлем белән күп тапкырлар күзгә күз очрашкан.

Ул беренче тапкыр Волхов фронтында утка кергән, 1нче Украина фронтында Днепрны кичкәндә Герой исеме алган.

Бу 1943 елның октябрендә була. Сержант Кузнецов үзенең элемтәчеләр отделениесе белән төнлә салга утырып елга аша чыга, чыбык сузып, алдынгы отряд белән артиллерия батареясы арасында элемтә урнаштыралар. Сугыш барганда аларга өзелгән линияне дошман уты астында берничә тапкыр ялгарга туры килә. Кузнецов ике тапкыр яралана, ләкин һаман сафта кала. Укчылар ротасының командиры үтерелгәч, ротаны атакага күтәрә.

Шул батырлыгы өчен Советлар Союзы Герое исеменә лаек булган Борис Кузнецов сугыштан соң да әле җиде ел буена Украинада бандерачыларга каршы бәрелешләрдә катнаша. Ул 1953 елда гына туган шәһәренә әйләнеп кайта, хәзер дә Казанда яши.

Батырлык дәресе бик тиз үтеп китте. Ләкин тормыш дәвам итә, укучылар сугыш каһарманнары белән тагын да очрашырга, алар алдында баш иеп, кирәкле һәм дөрес киңәшләре өчен рәхмәт хисе белән илне саклап калган каһарманнарны каршы алырга һәрчак әзер.