Агросәнәгать комплексы хезмәткәрләрен стимуллаштыру тармакның үсешен билгели

ТР Авыл хуҗалыгы һәм азык-төлек министрлыгында 2014 елда "ТР агросәнәгать комлексының иң яхшы белгече" II республика конкурсында җиңүчеләрне бүләкләү тантанасы булды. Авыл хуҗалыгы предприятиеләре һәм агрохолдингларның баш белгечләре: ветеринар, зоотехник, агроном, икътисадчы һәм хисапчыларына 100 мең сум күләмендә грант алуга дипломнар тапшырылды. Белгечләрнең һәр төркеме 33 кешедән тора иде.

Бүләкләү тантанасы алдыннан җиңүчеләргә ТР Премьер-министры урынбасары - ТР авыл хуҗалыгы һәм азык-төлек министры Марат Әхмәтов мөрәҗәгать итте. Ул билгеләп узганча, бүген Игенчеләр сараенда Татарстан агросәнәгать комплексының алтын фонды җыелган. Министр сүзләренчә, еш кына производствоның баш технологы фикере һәм бәяләмәсе ишетелми кала, ә моннан, иң беренче чиратта, тармак зыян күрә.

"Шуңа да узган елдан башлап, Татарстан Президенты белән килештереп, без Татарстан агросәнәгать комплексы белгечләре хезмәтен һәм аларның тармакка керткән өлешен тиешенчә бәяләргә булдык", - дип белдерде аграр ведомство башлыгы.

Дипломнар тапшырган вакытта М.Әхмәтов, аның урынбасарлары һәм ведомство карамагындагы бүлек җитәкчеләре икътисадның аграр секторының алдынгы белгечләрен ихластан котлады, аларга төрле теләкләрен дә җиткерде. Әйтик, яшьләре 50дән узган агрономнарга алар үзләренә лаеклы алмаш үстерүләрен теләде. Инженер-механикларга алга таба да компьютерлар урнаштырылган катлаулы чит машиналарында эшләргә өйрәнергә дигән юллама бирелде.

Икътисадчыларга аерым бурыч билгеләнде. ТР авыл хуҗалыгы һәм азык-төлек министры ассызыклаганча, агросәнәгать комплексының уңышы әлеге категория белгечләр эшчәнлегенә бәйле. "Сезгә авыл хезмәтчәннәрен матди кызыксындыру системасын эшләргә кирәк. Чөнки агросәнәгать комплексы хезмәткәрләрен стимуллаштыру тармакның үсешен билгели", - дип нәтиҗә ясады Марат Әхмәтов.