Вакыт Феясында кунакта

2 декабрьдә Әлмәт туган якны өйрәнү музеенда “Вакыт феясында кунакта” экскурсиясенең презентациясе булды. Чарада мәгариф идарәсе вәкилләре, мәктәпкәчә балалар учреждениеләре методистлары катнашты, ә 17нче мәктәпнең 1 А сыйныфы укучылары почетлы кунаклар булды.

Презентация балаларны сәгатьләрнең төрле төрләре белән таныштыру, аларда техника белән кызыксыну уяту, музей фондындагы предметлар белән таныштыру, төрле яшьтәге төркемнәрне музейга тарту максатында үткәрелде.

Тамаша Феяның тылсымлы рәвештә пәйда булуы һәм балаларны да, олыларны да “Вакыт Феясының тылсымлы замогы”на чакыруы белән башланды. Тамаша барышында балалар кояш сәгатенә, механик сәгатьнең телләренә һәм саннарына әверелделәр, сәгать остасының эше белән таныштылар. Фея һәр балага сәгатьләр һәм вакыт турында афоризмнар язылган бәләкәй “сәгать”ләр бүләк итте.

Сәгать күргәзмәсе 2015 елның гыйнварына кадәр дәвам итәчәк.