Шамил Агиев: "Безгә Татарстан Республикасы җитәкчеләренә сәнәгый сәясәт белән шөгыльләнергә кирәклекне күрсәтергә кирәк иде"

Республика делегациясенең Төркиягә сәфәре барышында Татарстан белән Төркиянең текстиль сәнәгате, җиһаз җитештерү, ИТ-тармак, туристлык һәм башка юнәлешләрдә хезмәттәшлеге хакында фикер алышынган. ТР Хөкүмәте йортында узган брифингта сәфәр нәтиҗәләре турында ТР сәнәгать һәм сәүдә министрының беренче урынбасары Руслан Кәбиров, ТР Инвестицион үсеш агентлыгы җитәкчесе Талия Миңнуллина, ТР Сәүдә-сәнәгать палатасы рәисе Шамил Агиев сөйләде.

Искәртеп узабыз: 30 ноябрь һәм 1 декабрьдә ТР Президенты Рөстәм Миңнеханов җитәкчелегендәге Татарстан делегациясе эш сәфәре белән Төркиядә булды. Делегация составына республиканың министрлыклары һәм ведомстволары вәкилләре кергән иде.

Сәфәр кысаларында Татарстан Президенты Төркия министрлык һәм ведомство җитәкчеләре, шул исәптән Төркия Республикасы тышкы эшләр министры Мәүлет Чавушоглы, икътисад министры Нихат Зейбекчи, Әнкара мэры Мәлих Гекчек, "Синджан" оешкан сәнәгый зона һәм Төркиянең кайбер предприятиеләре җитәкчеләре белән очрашты. Шулай ук Рөстәм Миңнеханов Әнкараның татар диаспорасы вәкилләре белән дә күреште.

Татарстан Президентының Әнкарага эш сәфәренең төп чарасы Россия Федерациясе Президенты Владимир Путин һәм Төркия Республикасы Президенты Рәҗәп Тайип Эрдоган рәислегендәге Россия-Төркия югары дәрәҗәдәге хезмәттәшлек советының киңәйтелгән утырышында катнашу булды. Россия һәм Төркия башлыклары сөйләшүләре барышында кайбер мәсьәләләр буенча килешүләргә ирешелде.

"Республика җитәкчелеге Төркия Республикасы белән хезмәттәшлектә берничә перспективалы юнәлеш билгеләде. Аерым алганда, текстиль сәнәгатендә. Синджан сәнәгый мәйданчыгында узган бизнес-форум кысаларында без Төркиядәге хезмәттәшләребезне Татарстанга текстиль җитештерүне оештырып булган мәйданчык буларак карарга өндәдек, алга таба ул республикада гына түгел, аннан читтә дә файдаланыла алыр иде", - диде Руслан Кәбиров. Шулай ук җиһаз җитештерү, медицина, ИТ-тармак, туристлык һәм башка юнәлешләр буенча да хезмәттәшлек ихтималы турында фикер алышынган.

ТР Инвестицион үсеш агентлыгы җитәкчесе Талия Миңнуллина билгеләп узганча, Төркиягә сәфәр бурычларына ТР һәм Әнкара Сәүдә-сәнәгать палаталары һәм ТР Мәгълүматлаштыру һәм элемтә министрлыгы белән "Белькент" университеты арасында ике килешү төзү кертелгән булган. Ул шулай ук "Синджан" сәнәгый зонасы белән танышулары хакында да бәян итте.

"Бөтенесе дә Татарстанның Россия төбәкләре белән Төркия арасындагы бәйләүче буын булганын ассызыклый. Безнең өчен иң мөһиме республика җитәкчеләренә Төркиядәге кебек сәнәгый сәясәт белән шөгыльләнергә, үз җитештерүчеләреңә булышырга кирәклеген җиткерү булды", - дип билгеләп үтте ТР Сәүдә-сәнәгать палатасы рәисе Шамил Агиев. Аның сүзләренчә, алар сәфәр барышында Төркиядә кадрлар әзерләнешенә дә игътибар иткән.

«Татар-информ»