Әлмәтлеләр өстәмә ял көннәрен киметү турында үз фикерләрен белдерә ала

Әлмәтлеләр өстәмә ял көннәрен киметү турында үз фикерләрен белдерә ала. Алар норматив актны икенче укылышка әзерләгәндә исәпкә алыначак.

"Ачык Татарстан" порталында ТР Дәүләт Советының дүртенче утырышында беренче укылышта кабул ителгән һәм җәмгыятьтә киң яңгыраш тапкан республика закон проектлары урнаштырылган. Хәзер Татарстанда яшәүче һәр кеше әлеге документларга карата үз фикерен җиткерә ала, дип хәбәр итә ТР парламентының җәмәгатьчелек һәм ММЧ белән үзара хезмәттәшлек бүлеге.

Алар арасында - "Татарстан Республикасы бәйрәм көннәре һәм истәлекле даталары турында" гы ТР Законы 1 нче маддәсенә үзгәрешләр кертү турында"гы һәм "Татарстан Республика территориясендә алкоголь продукциясен ваклап сату вакытын, шартын һәм урынын өстәмә чикләү һәм Татарстан Республикасының кайбер закон чыгару актларын көчен югалткан дип тану турында"гы закон проектлары.

http://open.tatar.ru/documents/ ("Закон проектлары турында фикерләшү") сылтамасы буенча әлеге закон проектлары турында тәкъдим һәм шәрехләрне калдырырга мөмкин. Алар норматив актны икенче укылышка әзерләгән вакытта исәпкә алыначак.

http://open.tatar.ru/deputy/#/map сылтамасы буенча "Татарстан Республикасы Дәүләт Советы депутатлары" сервисы урнашкан. Биредә аларның һәркайсының биографиясе һәм эшчәнлеге белән танышырга, үзеңне кызыксындырган сорауларны бирергә һәм кабул итүгә язылырга була.

Сервисларга Дәүләт Советы сайтында уң якта урнаштырылган тиешле баннерлардан файдаланып күчәргә мөмкин.