Товар җитештерүчеләргә минераль ашламаларны алдан алып куярга киңәш итәләр

ТР Авыл хуҗалыгы һәм азык-төлек министрлыгы товар җитештерүчеләргә минераль ашламаларны алдан алып куярга киңәш итә, чөнки аммиак селитрасы һәм катлаулы минераль ашламаларның бәяләре арта башлаган.

Бу хакта “Татар-информ” агентлыгы хәбәрчесенә тармак министрлыгында белдерделәр.

Аммиак селитрасы 10 процентка кыйммәтләнгән. Әгәр җәй бу ашламаның тоннасын 12,2 мең сумга сатып алып булса, хәзер – 13,7 мең сум. “Менделеевск-азот” ҖЧҖдә белдерүләренчә, бәяләр, чимал бәясе арту сәбәпле, күтәрелгән.

Татарстанны катлаулы ашламалар белән тәэмин итә торган Россия җитештерүчеләре белгечләре белдергәнчә, язгы кыр эшләре кампаниясенә минераль ашламалар бәясе шактый артачак. Моның белән бәйле рәвештә, район авыл хуҗалыгы һәм азык-төлек идарәләренә хатлар җибәрелгән. Аграр ведомство товар җитештерүчеләргә минераль ашламаларны алдан алып куярга киңәш итә.