Татарстанда керемнәрен һәм машиналарын күрсәтергә “оныткан” вазыйфаи затлар ачыкланган

Быел 10 ай эчендә ТР Прокуратурасы тарафыннан коррупция белән бәйле 4160 эш кузгатылган. Узган ел шул ук вакыт эчендә бу сан 5350 не тәшкил иткән булган. Быел кабул ителгән шикаятьләрнең 533 се судка тапшырылган, 1,7 меңгә якын шикаять нәтиҗәсендә 3 меңнән артык кеше административ җаваплылыкка тартылган.

“Быел шикаятьләрнең саны аз булу прокуратура хезмәткәрләренең эшчәнлеге кимегән дигән сүз түгел. Бу бары алдагы елларда профилактик чаралар уздыру нәтиҗәсе генә, чөнки узган ел закон бозган граждан быел да шул ук хатаны кабатламаска тырыша”, - диде РТ прокуратурасының коррупциягә каршы закон эшчәнлеген тикшерү бүлеге җитәкчесе Ринат Латыйпов бүген “Татмедиа” Республика матбугат һәм массакүләм коммуникацияләр агентлыгында узган матбугат конференциясендә.

ТР прокуратурасы вазыйфаи затларның эшчәнлеген дә һәрдаим тикшереп тора. Быел 10 айда, мисал өчен, 101 вазыйфаи зат дисциплинар җаваплылыкка тартылган.

Ринат Латыйпов ТР Авыл хуҗалыгы һәм азык-төлек министрлыгында узган прокуратура тикшеренү нәтиҗәләре белән дә таныштырып үтте. Мондый тикшерү нәтиҗәсендә, ТР авыл хуҗалыгы һәм азык-төлек министры урынбасарларының кайберләре ачык акционерлык җәмгыятьләрендә эшләп алган 5, 30, 116 мең сум күләмендә өстәмә хезмәт хакларын керемнәр турында декларацияләрдә күрсәтергә “онытканлыгы” ачыкланган. Икенче бер хезмәткәр исә 200 меңнән артык өстәмә керемен күрсәтмәгән. Ринат Латыйпов сүзләренчә, хәтта дача участокларын, автомашиналарын да керемнәр турындагы декларациядә күрсәтергә “онытучылар” бар икән.

Шундый характердагы хокук бозулар әлеге министрлыкның территориаль идарәләрендә эшләүчеләрдә дә теркәлгән. Хокук бозучылар дисциплинар җаваплылыкка тартылган һәм хәтта эш урыннарыннан азат ителү очраклары да булган.

ТР Мәгариф һәм фән министрлыгы хезмәткәрләре арасында уздырылган тикшерү нәтиҗәсендә, 3 хокук бозу очрагы теркәлгән. Республиканың Җир һәм мөлкәт мөнәсәбәтләре министрлыгы хезмәткәрләрендә һ.б. дәүләт органнарында узган прокуратура тикшерүләре хокук бозуларны ачыклаган.

Декларацияләрдә чыгымнарын күрсәтмәүчеләр дә исәпкә алынган. Мисал өчен, кыйммәтле машиналар сатып алып яшереп калуның 2 очрагы теркәлгән.