Район башлыгы сугыш ветераннарын туган көннәре белән котлады

Бүген Әлмәт районы башлыгы Мәҗит Салихов Бөек Ватан сугышында катнашкан ике ветеранда кунакта булды.

Бөек Ватан сугышы ветераны Усманов Масут Мөхәммәтҗан улына 23 ноябрьдә 88 яшь тулды. Ул Пенза өлкәсенең Кузнецк районында Большое Троево авылында туган. 1943 елда армиягә алынган, Ерак Көнчыгышка озатылган. 1945 елның сентябреннән Масут Усманов Кытай чигендә японнарга каршы сугышта катнаша, аннары 1948 елга кадәр Төньяк Кореяда була. 1950 елда гына демобилизацияләнә. 2нче дәрәҗә Ватан сугышы ордены, юбилей медальләре белән бүләкләнгән, милиция отличнигы.

Армиядән кайткач, Дүшәмбе шәһәрендә дәүләт куркынычсызлыгы органнарында эшли, пенсиягә подполковник званиесендә чыга.

1992 елда Усмановлар гаиләләре белән Әлмәткә күчеп киләләр. Бүгенге көндә ветеран оныгы Илдар Нәҗметдинов гаиләсе белән яши.

Икенче ветеран –Калугин Евгений Иванович 22 ноябрьдә 87 яшен билгеләп үтте. Ул Әлмәт районының Аппаково авылында туган, хезмәтен колхозда башлаган. 1944 елда армиягә алына. Евгений Ивановичны башта Ульяновск өлкәсендәге өйрәнү батальонына җибәрәләр, аннары ул Монголиядә Химкан шәһәрендә разведка батальонында рядовой солдат була. Японияне җиңүне Мукден шәһәрендә каршылый.

1951 елда гына армиядән әйләнеп кайта. Башта туган авылында эшли, 1979 елда гаиләсе белән Әлмәткә күчеп килә. Пенсиягә кадәр 3нче технологик транспорт идарәсендә эшли. Бүгенге көндә хатыны Мария Павловна белән гомер итә. 3 балалары, 6 оныклары, аларның 4 баласы бар.

2нче дәрәҗә Ватан сугышы ордены, “Японияне җиңгән өчен” медале, юбилей медальләре белән бүләкләнгән.

Мәҗит Салихов ветераннарга район башлыгының котлау открыткасын, чәчәкләр, истәлекле бүләкләр тапшырды.