“Рябинушка” 20 еллык юбилеен билгеләп үтте

14 ноябрьдә Нагорный авылы мәдәният йртында бер буш урын да калмаган иде. халык вокаль ансамбле “Рябинушка” үзенең 20 еллыгы уңаеннан юбилей концерты куйды. 2010 елдан Халык коллективы исемен йөрткән бу үзешчәннәр берләшмәсен Әлмәт районының визит карточкасы дияргә була.

Юбилей чарасын Кичуй авыл җирлеге башлыгы Галина Туманова ачты. Халык ансамбленең тарихы аның исеменә бәйле. 1993 елда авыл башлыгы итеп билгеләнгәч куәте ташып торган кыз клубта мәдәниятне торгызу максатында интеллигенция, нефтьчеләр, авыл хезмәтчәннәре катнашында үзәк оештыра. 1995 елда үзешчән сәнгать коллективы беренче тапкыр иҗат хисабы белән чыгыш ясый.

Елдан ел ансамбльнең осталыгы арта, репертуары ишәя, яңа традицияләр барлыкка килә. Коллектив төрле конкурсларда, фестивальләрдә катнаша. 2012 елда “Рябинушка” иҗат коллективларының “Единство России” дигән XXXV халыкара конкурс-фестивалендә катнашып 3нче дәрәҗә диплом ала, мәскәүлеләрне «Сероглазый” дигән җыры белән әсир итә. Галина Петровна юбилей хөрмәтенә ансамбль коллективына ике аккордеон, сәхнә костюмнары һәм фотоальбомнар бүләк итте.

Мәшһүр ансамбльне котларга ӘМР башкарма комитеты җитәкчесенең урынбасары Алексей Грушин, мәдәният идарәсе җитәкчесе Гүзәл Пайдуллина, музыка көллияте директоры Гүзәл Еремеева, Кичуй авылы депутаты мәктәп директоры Владимир Чумаков һәм башкалар килгән иде.

Бу көнне “Рябинушка” бөтен осталыгын куеп, күңелен салып иң яхшы номерларын күрсәтте.