Әлмәттә Авыл хуҗалыгы һәм эшкәртү сәнәгате хезмәткәрләре көне билгеләп үтелде

Авыл хуҗалыгы һәм эшкәртү сәнәгате хезмәткәрләре көне хөрмәтенә “Иске Әлмәт” мәдәният йортында район, ӘМР авыл хуҗалыгы идарәсе җитәкчелеге һәм хезмәт алдынгылары катнашында тантаналы концерт булды.

Тантаналы чараны ачып, район башлыгы Мәҗит Салихов авыл хезмәтчәннәрен бәйрәм белән котлады. Аларга рәхмәт сүзләре әйтеп, район башлыгы авыл хезмәтчәннәренең район һәм республика иминлегенә бәһасыз зур өлеш кертүләрен билгеләп үтте.

Быел Әлмәт районы басуларыннан 84 мең тоннадан артык ашлык җыеп алынды. “Кичүчат”, Токарликов исемендәге, “Чагылтау” хуҗалыкларында уңыш иң югары булды. Бу һәм башка хуҗалыкларның алдынгы комбайнчыларын бүләкләү өчен район башлыгының инициативасы белән 400 мең сумлап акча бүленде.

Мәҗит Салихов шулай ук терлекләрнең баш санын арттыру буенча нәтиҗәле эшләүче хуҗалыкларны атап үтте. Бу – “Ярыш”, “Кичүчат”, “Актау”, “Аппак” хуҗалыклары. Бүген Әлмәтрайонында мөгезле эре терлекләрнең баш саны 16 меңнән артып китә.

ТР президенты Рөстәм Миннеханов юлламасын үтәп, Мәҗит Салихов авыл хуҗалыгында гаилә фермаларына зур игътибар бирелергә тиешлеген әйтте. Хәзер алар районда 19, тагын 3 хуҗалык оешу стадиясендә.

Әлмәт һәм республика эстрадасы осталарының матур концерт номерлары бүләкләүләр белән аралашып барды. Югары һәм урта буын җитәкчеләргә, хезмәт алдынгыларына һәм авыл хуҗалыгы ветераннарына район һәм республиканың Почет грамоталары, күкрәк билгеләре, рәхмәт хатлары тапшырылды.