Әлмәт артистлары Парижда уңыш казанды

5 ноябрьдә Франция башкаласында балалар-яшьләр иҗатының “Мин яратам сине, Париж!” дигән ХХ халыкара фестивале булды. Анда Россия, Франция, Болгария, Казахстанның төрле шәһәрләреннән килгән коллективлар катнашты.

Фестиваль күп жанрлы иде: хореография иҗаты, театр иҗаты, музыка коралларында уйнау, җыр сәнгате – һәммәсе дә урын алды.

Татарстан вәкилләре булып 2нче һәм 15нче урта мәктәп укучылары барган иде. яшь артистлар матур чыгыш ясадылар, күп бүләкләр алып кайттылар.

“Вокаль иҗат. Эстрада вокалы. Соло” номинациясендә кече яшьтәгеләр арасында Дарья Кильдюшова һәм Амалия Габсәламова 2нче дәрәҗә дипломга ия булдылар. “Вокаль иҗат. Эстрада вокалы. Кече формалар” номинациясендә дә бөтен пьедесталны шушы кызлар биләде.

Өлкәннәр категориясендә “Вокаль иҗат. Эстрада вокалы. Соло” номинациясендә Ирина Смолькина икенче урын яулады.

“Инструменталь иҗат. Классика. Фортепиано соло” номинациясендә Виолетта Җиһаншина 3нче урынга чыкты.

Фестиваль кысаларында педагоглар һәм балалар өчен мастер-класслар үткәрелде.