Татарстанда 1 млн. 970,8 мең кв. м торак сафка кертелгән

Татарстан Республикасында 2014 елның 7 ноябренә 1 млн. 970,8 мең кв. м торак сафка кертелгән, ягъни еллык биремнең 82,2%. Былтыргы белән чагыштырганда бу 101,2 % тәшкил итә. Бу хакта бүген ТР Хөкүмәте йортында узган республика киңәшмәсендә Татарстан Республикасы төзелеш, архитектура һәм ТКХ министры Ирек Фәйзуллин хәбәр итте.

Киңәшмәне видеоконференцэлемтә режимында бөтен муниципаль районнар белән Татарстан Республикасы Президенты Рөстәм Миңнеханов уздырды.

Социаль ипотека программасы буенча республикада гомуми мәйданы 253,7 мең кв. м булган 4351 фатирлы 94 йорт төзелгән. Программаның төзелә торган объектлары арасында 33е югары әзерлек дәрәҗәсендә; уртача әзерлек дәрәҗәсендә - бер объект.

Ирек Фәйзуллин хәбәр иткәнчә, 2014 елда арендалы торакны төзү программасы кысаларында гомуми мәйданы 52 мең 913 кв. м булган 52 торак йортны төзү планлаштырылган. Шулардан бүгенге көнгә гомуми мәйданы 14 мең 131 кв. м. булган 40 йорт сафка кертелгән.

2014 елда Татарстан Республикасында мәктәпкәчә белем бирү учреждениеләрен төзү программасын гамәлгә ашыру турында ТР Төзелеш министрлыгы башлыгы тулырак сөйләде. 11 объектта яңа төзелеш буенча эш дәвам итә, шул исәптән 6 объектта төзү-монтаж эшләре тәмамлана.

2014 ел башыннан Дәүләт төзелеш күзәтчелеге инспекциясе 861 тикшерү уздырган. Хезмәтне саклау кагыйдәләрен һәм нормаларын бозган өчен 17 млн. 666 мең сумга 461 карар чыгарылган. Бүгенге көнгә 9 млн. 726 мең сумга штрафлар алынган.

Республика киңәшмәсе барышында гражданнарны авария хәлендәге торактан күчерү программасын гамәлгә ашыру мәсьәләләре турында да сүз барды (2013 һәм 2014 еллар этаплары). Бу мәсьәлә буенча Ирек Фәйзуллин докладын ТР Президенты каршындагы Дәүләт торак фондының башкарма директоры Тәлгать Абдуллин тулыландырды.