Әлмәт делегациясе Р.Фәхреддиннең 155 еллыгы уңаеннан Уфа шәһәрендә эшлекле сәфәрдә булды

6 ноябрь көнне Әлмәт муниципаль районы башлыгы киңәшчесе Флүс Гарипов җитәкчелегендә муниципалитет, мөхтәсибәт, мәгариф идарәсе вәкилләреннән, журналистлардан торган делегация танылган якташыбыз, мәгърифәтче һәм журналист Риза Фәхреддиннең тууына 155 ел тулу уңаеннан Башкортостан республикасы башкаласы Уфа шәһәрендә булып кайтты.

Риза Фәхреддин 1891 елда Уфа шәһәренә килеп, мөселманнарның Диния нәзарәте идарәсендә казый булып эшли башлый. 1922 елда аны Россия һәм Себер мөселманнары үзәк Диния нәзарәтенә мөфти итеп билгелиләр. Татар дөньясына танылган галим, дин әһеленең тормыш һәм иҗат юлы 1936 елда әлеге постта хезмәт куйганда өзелә.

Уфа шәһәрендә безне “Ихлас” мәчетенең имам-хатыйбы Мөхәммәт Галләм Мостафа каршы алды. Аның озатуында Әлмәт делегациясе мөселман зиратына барып Риза Фәхреддиннең каберендә булдылар. Биредә аның ике улы, 1953 елда вафат булган Хәсән һәм Рәшиднең дә каберләре урнашкан. Каберләр янында Әлмәт мөхтәсибәте имам– хатыйбы урынбасары Исмәгыйль хәзрәт Биккинин Ризаэддин Фәхреддин һәм аның гаилә әгъзалары рухына багышлап дога кылды. Әлмәтлеләр БСТ, “Татарстан – яңа гасыр” телевидениесенең Уфа журналистлары белән очрашып, интервьюлар бирделәр.
Эшлекле визитыбыз данлыклы “Ихлас” мәчетендә дәвам итте. Имам-хатыйб Мөхәммәт Галләм Мостафа сүзләренә караганда, мәчет Башкортостан башкаласында яшәүче татарларның рухи, мәдәни үзәге булып тора, аның үз телестудиясе бар, ай саен “Ихлас” журналы нәшер ителә.

Башкортостан республикасының иң абруйлы басма һәм электрон массакүләм мәгълүмат чарасы булган “Кызыл таң” газетасында очрашу сәфәребезнең иң онытылмас мизгелләре булды. Газетаның баш мөхәррире Фаил Фәтхетдинов газетаның эшчәнлеге, редакция хезмәткәрләре тарафыннан уйлап табылган, гамәлгә куелган проектлар турында сөйләде. “Кызыл таң” 95 еллык тирән тарихы булган саллы басма, оештыручылары -Башкортостан Республикасы Дәүләт җыены – Корылтай һәм хөкүмәт, гомуми тиражы - 29000 данә.

Сәфәребез Уфа шәһәренең иң иске мәчете Әбдел-Кадир әл-Җиләни исемендәге мәчетләр комплексында дәвам итте. Ул 1830 елда Россия үзәк Диния нәзарәтенең беренче мәчете буларак сафка бастырыла. Ишек алдында үзәк нәзарәттә эшләгән мөфтиләрнең каберләре урнашкан. Әлмәтлеләр якташыбыз Ризаэддин Фәхреддин гомеренең соңгы көннәрен уздырган урыннарда, Россия мөселманнарының үзәк Диния нәзарәте югары мөфтие резиденцияләрендә дә булдылар.

Россия мөселманнарының үзәк Диния нәзарәте югары мөфтие Тәлгать Таҗетдин Әлмәт делегациясен бик җылы һәм дустанә каршы алды. Чәй табыны артында дәвам иткән әңгәмә вакытында нефть башкаласында дин эшләре, мәктәпләрдә, балалар бакчаларында алып барылган әхлак тәрбиясе, “Ак калфак” татар хатын –кызлар оешмасы эшчәнлеге турында сүз барды. Тәлгать Таҗетдин Әлмәттә еш булуын әйтеп, каланың архитектура ягыннан гына түгел, рухи планда үсеш алуына да шатлануын белдерде.

Сәфәребез хакында тулырак язманы "Альметьевский вестник" газетасының 45 нче санында укый аласыз.

Фәрдия Хәсәнова, “”Альметьевский вестник” газетасы