“Уңайлы мохит” программасы 2020 елга кадәр озайтыла

29-30 октябрь көннәрендә Казанда “Һәркемгә дә яраклаштырылган дөнья: чикләүләрсез мохит тудыруда халыкара һәм илебез тәҗрибәсе” дип исемләнгән фәнни-гамәли конференция уза. Россиянең 46 төбәгеннән һәя якын чит илдән килгән кунаклар республикабызны һәркем өчен дә уңайлы мохит булдыру өлкәсендәге проблемалар турында сөйләшү, тәҗрибә уртаклашу мәйданы итеп сайлаган.

Әлеге чараның Татарстанда үткәрелүе бер дә очраклы түгел. Республикабыз “Уңайлы мохит” программасын тормышка ашыру дәверендә шактый гына зур уңышларга ирешә. Бүгенге көндә социаль, мәдәни, спорт объектларының азмобиль төркемнәр өчен яраклаштыру дәрәҗәсе шактый югары. Яңа торак йортлар инвалидлар ихтыяҗларын да күздә тотып төзелә. Билгеле, иске биналарда уңайлы мохит тудыруда проблемалар күп. Әмма бу юнәлештә дә актив эш алып барыла.

Конференция ачылышында сәламләү сүзе белән чыгыш ясаган Татарстан Премьер-министры урынбасары Васил Шәйхразиев билгеләп үткәнчә, илебездә инвалидлар исәбе арта бара. Һәм бу Россиядә генә шулай түгел, мондый тенденция дөнья күләмендә күзәтелә.

- Соңгы елларда республикабызда уңайлы мохит тудыру юнәлешендә башкарылган эш шактый күләмле булса да, без әле юлның башында гына. Инвалидларның барлык ихтыяҗларын үтәү, башкалар белән тигез хокуклар тудыру өчен күп нәрсәләр эшләргә туры киләчәк әле. Нәтиҗәдә без азмобиль төркемнәргә инфраструктура гына тудырып калмыйча, чикләнгән мөмкинлекле кешеләргә карата карашны да үзгәртергә тиешбез, - диде ул үзенең чыгышында.

Россия Хезмәт һәм социаль яклау министрлыгының Инвалидлар эшләре буенча департамент директоры урынбасары Анна Гусенкова Россия Хөкүмәте “Уңайлы мохит” программасын 2015 елдан соң да дәвам иттерү карары кабул итүе турында хәбәр итте. Аның сүзләренчә, ул тагын 5 елга озайтылачак. Шулай ук киләсе елдан бу программаны финанслау тәртибе дә үзгәрәчәк дип белдерде ул. Хәзерге вакытта уңайлы мохит тудыруда федераль үзәк катнашуы 50 процент дәрәҗәсендә, калган чыгымнар республика казнасы хисабына каплана. Алдагы елда җирле бюдңетларга йөкләнеш кимиячәк – 70 процент чыгымнарны федераль акчалар хисабына каплау күздә тотыла.

Гүзәл НАСЫЙБУЛЛИНА