9 айда Татарстанның нефть компанияләре 25 млн. тонна чамасы нефть чыгарган

Кичә Татарстан Республикасы Президенты Рөстәм Миңнеханов Әлмәттә “Татнефть” ААҖ нең штаб-фатирында республиканың кече нефть компанияләре эшчәнлеге буенча киңәшмә үткәрде. Киңәшмәдә “Татнефть” ААҖ генераль директоры Наил Маганов, ТР тармак министрлыклары һәм ведомстволары, федераль органнарының территориаль бүлекчәләре җитәкчеләре катнашты.

Агымдагы елның 9 аенда Татарстанның нефть компанияләре 24 млн. 748 мең тонна нефть чыгарган, - бу, узган елның шул чоры белән чагыштырганда, 0,9 процентка күбрәк, дип ачыклык кертте Рөстәм Миңнеханов.

Кече компанияләр республика бюджеты формалашуга сизелерлек өлеш кертә, ә бүген ул шактый киеренке хәлдә, дип ассызыклады Татарстан Президенты. Нефть сәнәгате икътисадның нигезе булып тора, диде президент, бүген нефть бәясе төшкән, ә доллар үскән катлаулы вәзгыятьтә бу бик мөһим. Дәүләт органнары, үз чиратларында, нефтьчеләр проблемаларын чишүдә булышуны дәвам итәчәк, дип ышандырды президент.

Республика башлыгы, запаслар структурасында авыр чыгарыла торган нефть өлеше зур булган шартларда ирешелгән позицияне саклау мөһим, дип билгеләп үтте. Аның сүзләренә караганда, биредә заманча технологияләрнең роле зур. Ул игътибарны санкцияләр шартларында импортны алмаштыручы технология һәм җиһазлар белән шөгыльләнергә кирәклегенә юнәлтте.

“Нефтеконсорциум” ЯАҖ генераль директоры Фәнис Вәлиев 2014 елның 9 аенда ТР кече нефть компанияләренең эшчәнлеге һәм ел ахырына кадәр көтелгән нәтиҗәләр турында сөйләде. Гыйнвар-сентябрьдә кече нефть компанияләре 5 млн 180 мең тонна нефть чыгарган, узган елга караганда, 138 мең тоннага күбрәк. Ел нәтиҗәләре буенча 6 млн. 800 мең тонна нефть чыгару планлаштырыла, - бу планнан 6 процентка артык.

ТР финанслар министры Радик Гайзатуллин кече нефть компанияләренең республика бюджетына түләүләрен шәрехләде.