Сыек валюта

Бу заманда мотор ягулыгы сәяси, коммерция мөнәсәбәтләрендә генә түгел, криминаль өлкәдә дә валютага әйләнеп бара.

1 августта «Татнефть-Охрана» хосусый сак предприятиесенең хокук бозулар профилактикасы бүлеге хезмәткәрләре «Татнефть-АЗС Центр» ҖЧҖнең сакчылык-режим хезмәтендә эшләүчеләр белән бергә Чаллы-Казан юлындагы автостоянкада бер яшь кешене тоткарлыйлар. Хосусый фермада шофер булып эшләүче бу Казан кешесе MAN автоцистернасында “Татнефть”нең Марий-Эл республикасындагы АЗСларына бензин илтә икән. Юлда ягулыкның беразын үз кесәсенә агызырга уйлаган: Мамадыш районында яшәүче бер авыл кешесенә 130 литр бензинны литрын 20шәр сумнан сатып җибәргән.

Ике атнадан Мәскәү-Чиләбе трассасында «Татнефть-АЗС Центр» ҖЧҖнең Баулы филиалы заправкасында шуңа охшаш хәл була. Scania автомобилен йөртүче “Татнефть” АЗСына дигән ягулыкны чит кешегә сата, 300 литр дизель ягулыгы литры 25әр сумнан читкә ага. Нефть продуктлары ташу белән шөгыльләнүче «Омега-Транс» ҖЧҖгә кемне эшкә алуларын уйларга кирәк булган, чөнки бу шофер 2003 елда Әлмәттә ят милеккә кул сузган өчен шартлы рәвештә хөкем ителгән булган.

Август азагында ЧОП «Витязь» ҖЧҖ хезмәткәрләренең уяулыгы аркасында тагын бер җинаять ачылды. Әлмәттәге УТТ-1нең Кәләй авылы янында калдырылган бульдозерында төнлә сак сигналы эшли. Барсалар, бульдозерның багы тишелгән була. “Витязь” экипажы җинаять урынынан ычкынырга тырышкан “УАЗ” автомобилендәге каракларны тоткарлый. Ягулык тутырылган канистрлар, перчаткалар, лом һәм шланг бу эштә өстәмә дәлил була.