Мәҗит Салихов ТР Милли музее вәкилләре белән очрашты

Әлмәт районы башлыгы Мәҗит Салихов ТР Милли музее вәкилләре белән очрашты. Аларның Әлмәткә килүенең максаты – Әлмәттә яшәүче Бөек Ватан сугышы ветераннары турында материаллар туплау. Мәдәният елы кысаларында, Бөек Ватан сугышында җиңелүнең 70 еллыгы алдыннан ТР хөкүмәте инициативасы белән уникаль проект – 1941-1945 еллардагы Бөек Ватан сугышына багышланган виртуаль интернет-музей проекты башланды. Проектның максаты – Ватан сакчылары турында хәтерне мәңгеләштерү, яшьләрдә һәм мәктәп балаларында ватанпәрвәрлек хисләре тәрбияләү. Бу мөһим эш, республиканың төп музее, Татарстандагы барлык музейлар өчен фәнни-методик үзәк буларак, ТР милли музеена ышанып тапшырылды.

Виртуаль музей, архив һәм китапханә фондларының кешеләргә барып җитүен тәэмин итәргә, аерым экспонатларны һәм коллекцияләрне, фотогалерея һәм видеоматериалларны, музей экспозицияләрен һәм күргәзмәләрен күрү мөмкинлеге бирәчәк. Интернет-музей Татарстанның “Хәтер китабы” картотекасы белән дә бәйләнештә булачак.

Очрашу барышында Мәҗит Салихов виртуаль музей проекты җитәкчесе Елена Сөнгатовага Әлмәттә ветераннар белән нинди эшләр алып барылуы турында сөйләде. Шулай ук Җиңүнең 70 еллыгына әзерлек мәсьәләсе дә кузгатылды.

“Без республиканың күп районнарында булдык, - диде Елена Сөнгатова. – Хәзер нефть районнарын йөреп чыгасы калды. Әлмәт районы биредә һәр ветеранга аерым игътибар бирелү, шәһәр һәм район җитәкчелегенең һәр ветеранны күреп белүе белән аерылып тора”.