Әлмәттә “Созвездие-Йолдызлык” яшьләр фестивале концерты булды

Әлмәттә эстрада сәнгатенең “Созвездие-Йолдызлык” XIV республика ачык телевизион яшьләр фестиваленең концерты булды. Чараның шәрәфле кунаклары арасында Әлмәт районы башлыгының урынбасары Наҗия Хәйдәрова, “Созвездие-Йолдызлык” фестиваль хәрәкәтенең генераль продюсеры Дмитрий Туманов, ТР президенты каршындагы мәдәниятне үстерүгә булышлык фонды башкарма директоры Нурия Һашимова бар иде.
Наҗия Хәйдәрова үзенең сәламләү сүзендә “Созвездие-Йолдызлык” эстрада сәнгате фестиваленең республикабызны берләштерүен, Татарстан яшьләрендә, шул исәптән Әлмәт яшьләрендә дә булган иҗат потенциалын күрсәтүен билгеләп үтте. Ул фестивальне оештыручыларга, укытучыларга, бигрәк тә яшь талантларның ата-аналарына рәхмәт сүзләре әйтте.
Эстрада сәнгатенең “Созвездие-Йолдызлык” XIV республика ачык телевизион яшьләр фестивале быел 14нче тапкыр үтә. Үзләренең чыгышы белән тамашачыларны Әлмәт, Азнакай, Лениногорск, Сарман, Зәй, Түбән Каманың талантлы яшьләре сөендерде, чыгыш ясаучыларның саны 300дән артык булды.