Район башлыгы сугыш ветеранын котлады

Бөек Ватан сугышында катнашкан Зарипов Зәки Нурмөхәммәт улына 30 августта 97 яшь тулды. Ул бүген дә туган көне белән котлаулар кабул итте. Район башлыгының котлау открыткасын, матур чәчәкләр бәйләмен аңа бүген район башлыгы Мәҗит Салихов үзе китереп тапшырды. Ул ветеранга ныклы тазалык һәм озын гомер теләде, йөз яше тулган көнне дә бик рәхәтләнеп котларга киләсен әйтте. “Радиоприбор” заводы вәкилләре дә юбилярга иң матур теләкләрен җиткерделәр.
Зәки Зарипов Сарман районында Иске Әхмәт авылында туган, шунда 6 класс белем алган. 12 яшеннән мөстәкыйль тормышка аяк баскан – Свердловск өлкәсендә ФЗУга укырга кергән. Аннары Донбасста слесарь булып эшләгән, 1938 елда шуннан армиягә алынган. 1939 елда фин сугышында катнашкан, 1940 елда хәрби хезмәттән азат ителгән.
1942 елда фронтка киткән, Кырымны дошман явыннан саклау өчен сугышларда катнашкан. Румыния, Болгария җирләрендә сугышкан. Болгариядәге сугышларда яраланган, әмма госпитальгә китүдән баш тарткан, үз дивизиясенең санчастенда дәваланган, хезмәтен дә өзмәгән. Җиңү көнен дә шунда Болгариядә каршылаган. “Батырлык өчен”, “Сугышчан хезмәтләре өчен”, “Сталинград оборонасы өчен” медальләре, юбилей медальләре бар.
Сугыштан соң Зәки Зарипов туган авылына кайткан, пенсиягә чыкканчы авыл советы рәисе булып эшләгән. 2004 елда Әлмәткә кызы янына күчеп килгән. Хатыны белән алар 4 бала тәрбияләп үстергәннәр, 10 оныклары, 11 оныкчыклары бар.
“Үзенә институтта укырга насыйп булмагач, әтиебез барлык балалары да әйбәт белем алсын дип тырышты, - ди ветеранның улы Рашат Зарипов. – Без барыбыз да югары белем алдык. Әти һәрвакыт конкрет, сүзендә тора торган кеше булды, һаман да безгә үрнәк булып кала”.