Сәүдә-экономика техникумында Белем көне

Мәҗит Салихов Әлмәт дәүләт муниципаль хезмәт институтының СПО факультеты (сәүдә-экономика техникумы) студентларын Белем көне белән котлады. Яңа уку елын студентлар яңартылган бинада башлыйлар.
Җәйге чорды монда өлешчә капиталь ремонт ясалды, нәтиҗәдә спорт һәм актлар заллары, бинаның фасады төзекләндерелде. Уку кабинетлары һәм шейпинг-класс уңайлырак итеп үзгәртелде. Хосусый эшкуар ярдәме белән техникумның территориясе асфальтланды. Ремонт эшләренә 6,5 миллион сум акча тотылды.
Институтның ректоры Ильяс Сәлахов “Татнефть” компаниясе һәм аның структур бүлекчәләре җитәкчеләренә, хосусый эшкуар Дамир Ихсановка һәм башка спонсорларга, ремонт бригадаларына, үз коллективларына шундый сыйфатлы эш өчен зур рәхмәт белдерде. Институтның күзәтчелек советы рәисе район башлыгы Мәҗит Салиховка ректор даими булышлык итүе, барлык мәсьәләләрне күз уңында тотуы өчен аеруча рәхмәт сүзләре әйтте.
Мәҗит Салихов студентларны һәм укытучылар составын икеләтә бәйрәм – Белем көне һәм, ремонт эшләрен уңышлы төгәлләп, яңартылган бинада укый башлау белән котлады.