Белем көнендә – музейга

Татарстан Милли музее 1 сентябрь көнне 10.00, 12.00 һәм 14.00 сәгатьләрдә беренче сыйныф укучыларын үзенә чакыра. Белем дөньясына юлны нәкъ менә музейдан башларга кирәк, дип саный алар.

Замана мәктәбе – бала вакытын күп уздыра торган урын гына түгел, ә киләчәк тормышка әзерлек институты булып та тора.

Беренче сыйныфка аяк басу - һәр бала тормышында мөһим вакыйга. Сабый чакта әлеге адымга бик үк игътибар бирелмәсә дә, өлкәннәр аны озын марафонның башы икәнен яхшы аңлый. “Марафончы” өчен музей – рухи сусауны канәгатьләндерүдә бер йотым су кебек. Ядкәрханә атмосферасы үзе үк эстетик тәрбия, балада матурлыкка мәхәббәт тәрбияли, күзаллау сыйфатын да арттыра. Биредә алар күп ачышлар ясый, дуслар таба. 1 сентябрь көнне яшь кунакларга туган як тарихы белән таныша башларга менә дигән мөмкинлек бирелә. Әкияти персонажлар борынгы бабаларыбыз хакында бәян итәчәк, ди проект авторлары.

Музейның фәнни хезмәткәрләре тарафыннан балалар өчен махсус программа төзелгән. Музей-педагогик дәресләрендә һәр бала үз чүлмәген ясый алачак. Ә макароннан исә ”ювелир” эшләнмәләр дә менә дигән чыга икән. Музей хуҗасы Муза мич тирәсендәге кирәк-яраклар белән таныштыра, әбиләребез кулланган җиһазларны күрсәтә. “Ел фасыллары” дигән күргәзмәдә исә Көзбикә Татарстан елгалары белән таныштырачак. Нәни дуслар өчен төрледән-төрле мавыктыргыч мастер класслар да эшләп торачак икән.

Сентябрь аенда Татарстанның Милли музеена беренче сыйныф укучылары бушлай йөри алачак!

/intertat.ru