Татарстанда җәйнең соңгы көне елак булачак

Аерым алганда, иртәгә, 31 августта, республикада аязучан болытлы һава көтелә. Төнлә урыны белән һәм көндез Татарстанның кайбер районнарында яңгыр, урыны белән яшенле яңгыр булуы ихтимал. Төнлә һәм икенче көнне иртән томан төшәргә мөмкин, дип хәбәр итә ТРның Гидрометеорология һәм әйләнә-тирә мохитне күзәтү буенча идарәсе.

Шул рәвешле, ТРда иң түбән температура төнлә 7-12 градус җылы булыр дип фаразлана, иң югарысы – көндез 14-19 градус.

Казанда иртәгә көндез атмосфера һавасы 18 градуска кадәр җылына.

Фаразлама буенча, 1 сентябрьгә каршы төндә термометр баганасы плюс 7-11 градуска кадәр төшә.

ИА "Татар-Информ"