Төзекләндерелгән Шевченко урамы – Республика көненә зур бүләк

29 август тарихка Әлмәтнең инфраструктурасын камилләштерүдә тагын бер адым алга китү көне буларак кереп калды. Республика көне, нефтьчеләр бәйрәме алдыннан Әлмәт - кара алтын табучылардан чираттагы зур бүләк - Шевченко урамының Белоглазовтан алып Төзүчеләр проспектына кадәр реконструкцияләнгән һәм капиталь ремонтланган өлеше кабул ителде.

Район Татарстанда эшләп килүче 30 программаның 23ендә актив катнаша. Социаль проектларның күбесе “Татнефть” ААҖ булышлыгы белән тормышка ашырыла. Шундый мөһим проектларның берсе – юллар. Нефтьчеләр тарафыннан әлеге максатларга гына да 250 миллион сум бүлеп бирелгән.

Өч ел элек Татарстан Президенты Рөстәм Миннеханов катнашында Шевченко урамының беренче өлеше ачылган иде. Бүген исә нефтьчеләр башкаласында яшәүчеләргә зур горурлык белән шәһәрнең транспорт хәрәкәтендә төп артерия булып торган урамның өченче өлеше куллануга тапшырды. Юл 12 метрдан 21 метрга кадәр киңәйтелеп, 6 полосага җиткерелде. Гранит бордюрлар, хәрәкәт белән автомат рәвештә идарә итүче юл билгеләре, тукталыш павильоннары, куәтле электр линияләре - бар да бер кешегә туры килә торган машиналар саны буенча Россиядә өченче күрсәткечкә ия булган Әлмәттә уңайлы һәм куркынычсыз шартлар булдыруга юнәлдерелгән.

Юлны ачу тантанасында Әлмәт муниципаль районы башлыгы Мәҗит Салихов, “Татнефть” ААҖ генераль директорының капиталь төзелеш буенча урынбасары Федор Щелков, ТР Дәүләт Советы депутаты Николай Кольгин, “Елховнефть” идарәсе җитәкчесе Рөстәм Хәлимов, төзүчеләр, журналистлар катнашты.

Чараны ачып, район башлыгы әлмәтлеләрнең алда торган мөһим бәйрәмнәрне лаеклы каршылауларын ассызыклады.

– Шевченко урамының өченче өлешен реконструкцияләү турында карар кабул ителгән иде. Әлеге максатларга 122 млн сум күләмендә акча бүлеп бирелде. Проектның заказчысы -Әлмәтнең капиталь төзелеш идарәсе, башкаручы - “Елховнефть” идарәсе. Шевченко урамын төзекләндерү кыска вакытларда һәм югары сыйфат белән башкарып чыгылды. Кайчандыр зур булмаган бер урам, хәзер каладагы транспорт хәрәкәтенең тоткарлыксыз эшләвен тәэмин итүче, Европа стандартларына җавап бирерлек киң, иркен проспект. Әлеге һәм башка күп проектларны тормышка ашыручы нефтьчеләребезгә, шәхсән “Татнефть” ААҖ генераль директоры Наил Магановка барлык әлмәтлеләр исеменнән олы рәхмәт сүзләрен җиткерәм. Киләчәктә дә куйган максатларыбызга ирешеп, аңлашып, шулай нәтиҗәле итеп эшләргә язсын, - диде Мәҗит Хаҗипович үзенең чыгышында.

Юл төзелешендә аеруча уңышлы эшләүче хезмәткәрләргә Әлмәт муниципаль районы Советы һәм башкарма комитетның Мактау грамоталары, Рәхмәт хатлары тапшырылды.

“Татнефть” ААҖ генераль директоры урынбасары Федор Щелков мондый зур проектларның компания тарафыннан инвестицияләнүендә нефтьче депуталарның роле зур булуын билгеләп узды. Халыкның тормыш –көнкүрешен яхшыртуга юнәлдерелгән средстволарның нефтьчеләрнең тәүлек дәвамында алып барылган авыр хезмәте нәтиҗәсе булуын истән чыгармаска, эксплуатацияләүгә тапшырылган объектларны дөрес итеп кулланырга чакырды, бәйрәм белән тәбрикләде.

Тантаналы рәвештә кызыл тасманы кискәннән соң беренче машиналар колоннасы юлга кузгалды. Юлларыбыз имин булсын !

Фәрдия Хәсәнова, “Альметьевский вестник” газетасы