Мәҗит Салихов районның иң яхшы механизаторларына премияләр тапшырды

Район башлыгы Мәҗит Салиховның үз инициативасы белән башланган матур традиция – иң яхшы комбайнчыларга премияләр тапшыру быел да дәвам итә. Токарликов исемендәге хуҗалыкның 19 механизаторы эш урыннарында район башлыгы кулыннан акчалата премияләр һәм рәхмәт хатлары алдылар.

Беренче норманы үтәгән өчен комбайнчыларга 500 сум, икенче норма өчен 700 сум, өченче норманы үтәгәндә 1000 сум бүләк тапшырыла. Шуннан соңгы нормалар өчен 1500 әр сум бирелә.

Комбайнчыларның алтынчы премия алу очраклары да бар. Шундыйларның берсе – Валентин Матюшин. Ул кышын автомашина йөртә, җәй көне комбайнда, эшен яратып эшли. Район башлыгы премияләрен ел саен алып килә. “Быел алтынчы тапкыр премия алам инде, - ди Валентин Матюшин. – Хезмәтеңне шулай югары бәяләүләре бик күңелле”.

“Григорьев” фермер хуҗалыгында район башлыгы кулыннан Юрий Горячев бүләк алды. Моңа кадәр ул Мәскәүдә яшәгән, кыскартуга эләккәннән соң туган ягына кайтып фермер хуҗалыгында эшли башлаган. “Озак еллар төрле эшләр эшләгәндә мин гел комбайнны сагындым, - ди Юрий Горячев. – Балачакта ук комбайнда эшләгән идем, шуңа күрә монда эшләү миңа ошый”.

Бу көнне “Слесаревы” фермер хуҗалыгыннан механизатор Владимир Аверьяновка да бүләк тапшырылды.