Сиренькино һәм Ямаш авылларында мәктәпләр капиталь ремонттан соң ачылды

Быел республика программасы кысаларында Әлмәт районында 2 шәһәр һәм 4 район мәктәбе капиталь ремонтланды. Шуларның берсе – Сиренькино мәктәбен ачу тантанасында район башкарма комитеты җитәкчесе Марат Гыйрфанов, башкарма комитет җитәкчесенең мәгариф һәм мәдәният буенча урынбасары Резеда Заһретдинова, мәгариф идарәсе башлыгы Рафаэль Ганиев катнашты. Сиренькино мәктәбе 1981 елдан бирле эшли. Монда якын-тирәдәге 7 авылдан балалар укый. Мәктәп составына Кләмәнтәй һәм Ерак Ивановка филиаллары да керә. Бүгенге көндә анда 160 укучы укый, аларны 25 укытучы укыта.

Шушы ук көнне Ямаш авылында да истәлекле вакыйга булды. Ямаш мәктәбе 2014 елда 30 елдан артык төзелгән мәктәпләрне капиталь ремонтлау буенча республика программасына кертелгән иде, ул хәзер яңадан туды дияргә була. 1977 елда тапшырылган бу мәктәптә 70нче елларда Әлмәт, Зәй, Түбән Кама районнарына керүче авыллардан килеп 400гә кадәр бала укый иде. 2011 елдан бирле ул база мәктәбе булып тора, анда хәзер 137 бала укый.

Авыл кешеләрен күңелле вакыйга белән райбашкарма җитәкчесе Марат Гыйрфанов тәбрикләде. Бу эштә катнашканнарның һәммәсенә рәхмәт белдерде, киләчәк буыннар да рәхәтләнеп укырлык булсын өчен укучылар мәктәпкә сак карарлар дигән теләк белдерде, балаларны 4-5 билгеләренә генә укырга чакырды.

Быел 1нче сыйныфка 17 бала керә. Укыту процессын тиешле дәрәҗәдә алып бару өчен мәктәптә бөтен шартлар да бар.