3нче урта мәктәп капиталь ремонттан соң ачылды

Шәһәрдә иң элеккеләрдән булган 3нче урта мәктәп быел капиталь ремонт буенча республика программасына кертелгән иде. Анда түбә ябуга гына 5,5 миллион сум акча тотылды. Мәктәптә шулай ук электр үткәргечләре, ишек-тәрәзәләр алыштырылды. 2010 елда Дәүләт Советы депутаты Николай Кольгин булышлыгы белән кайбер классларда тәрәзәләр алыштырылган иде инде, быел бу эш ахырына җиткерелде. Мәктәпне төзекләндерүгә республика бюджетыннан 15 миллион сум акча бүленде.

Яңартылган мәктәптә район башлыгы Мәҗит Салихов, ТР Дәүләт Советы депутаты Николай Кольгин һәм башка рәсми затлар булды. Район башлыгы укытучылар коллективын һәм балаларны шундый күңелле вакыйга белән котлады, спонсорларга – “Карат” компаниясенә һәм “Әлмәт җылылык челтәрләре” ААҖнә -матди ярдәмнәре өчен рәхмәт әйтте, аеруча яхшы эшләгән төзүчеләргә мактау кәгазьләре һәм рәхмәт хатлары тапшырды.