Район башлыгы “Могҗизалар кыры”нда булды

Кичә район башлыгы Мәҗит Салихов “Могҗизалар кыры” микрорайонында төзелүче балалар бакчасындагы эшләр белән танышты.

Бакча 140 урынга исәпләнгән. Аны 2015 елда файдалануга тапшыру күздә тотыла.

– Һава торышы әйбәт торганда нигезне, коробканы яхшылап әзерләп калырга кирәк, – диде Мәҗит Салихов. – Аннан отделка эшләренә дә керешергә мөмкин булачак.

Сүз уңаенда, быел республика программасы буенча “Көнбатыш капка” һәм “Яшьлек” микрорайоннарында ике балалар бакчасы файдалануга тапшырылды. Бүген 3 яшьтән өстән булган сабыйларның һәммәсе бакчадан урын белән тәэмин ителгән. Ә менә 1,5-3 яшькә кадәр ике меңнән артык сабый чират көтә. Мәҗит Салихов әйтүенчә, “Көнбатыш капка” микрорайонында тагын бер балалар бакчасы төзелешенә проект-смета документлары әзерләнә.