Мәҗит Салихов: “Әлмәтнең социаль–икътисади үсеш күрсәткечләре белән горурлана алабыз”

19 август көнне Әлмәт муниципаль районы башлыгы Мәҗит Салихов республика һәм җирле массакүләм матбугат чаралары вәкилләре белән очрашты. 2014 елның беренче яртыеллыгы буенча социаль – икътисади үсеш нәтиҗәләренә багышланган матбугат конференциясендә район башлыгы журналистларны кызыксындырган күп кенә сорауларга җавап биреп, нефтьчеләр башкаласындагы вакыйгалар торышы белән таныштырды.

Мәҗит Хаҗипович матбугат вәкилләрен сәламләп, дүртенче власть вәкилләре эшчәнлегенә күп нәрсә бәйле булуын ассызыклады. “Кемнең кулында мәгълүмат, шуның кулында бөтен дөнья, дию бик урынлы,”- диде ул.

Матбугат конференциясе Әлмәт муниципаль районы Советы һәм башкарма комитеты кушуы буенча язылган “Әлмәтлеләр – бәхетлеләр” җырының презентациясе белән башланып китте. Җырның авторлары - Гөлгенә Кәримова һәм Владимир Федоров.

Мәҗит Салихов билгеләп узганча, районда уңайлы яшәү шартлары булдыру өчен күп эшләр башкарыла.

“Бу республика җитәкчелеге, нефтьчеләр, завод һәм башка сәнәгать предприятиеләрендә эшләүчеләрнең уртак тырышлыгы нәтиҗәсе. Төзек, чиста, инфраструктурасы нык үсеш алган Әлмәтне күреп күңел сөенә. Нефтьчеләр башкаласында эшләве дә, яшәве дә бик уңай, “- дип билгеләп үтте район башлыгы.

Республикада 30 дан артык төрле юнәлештәге программа эшли, Әлмәт шуларның 23 ендә актив катнаша. Социаль, икътисади өлкәләрдә халыкның тормыш-көнкүрешен яхшыртуга агымдагы елда федераль, республика, район бюджетыннан 4 млрд сумнан артык средство бирелгән.

Районда һәм шәһәрдә булдырылган уңай шартлар демографик ситуациядә ачык чагыла. Соңгы берничә елда халык санының табигый артымы 2 мең кешедән артык. Торак төзелеше буенча Әлмәт, Казан һәм Түбән Камадан кала өченче урында. Ел саен 155 мең кв. метрдан артык торак тапшырыла.

Балалар саны арту мәгариф учреждениеләрен модернизацияләү ихтыяҗын тудыра. Үз вакытында “Бәләкәч” дип аталучы Президент программасында актив катнашу, районда һәм шәһәрдә яңа балалар бакчалары төзергә, элеккегеләрен ремонтлап, киредән куллануга тапшырырга мөмкинлек бирде. 2014 елда “Яшьлек” һәм “Көнбатыш капка” микрорайоннарында 260 һәм 270 урынга исәпләнгән ике балалар бакчасы төзелде. ТР Президенты кушуы буенча, халык бик тыгыз яши торган “Могҗизалар кыры” микрорайонында 140 урынга исәпләнгән тагын бер бакча кызу темплар белән сафка бастырыла. Ел саен мәктәпләр ремонтлана, яңалары төзелә.
Юлларны төзекләндерү буенча быел искиткеч күләмле эшләр башкарылган.Төрле дәрәҗәдәге бюджетлардан район юлларын ремонтлау һәм реконструкцияләүгә 1 млрд 300 млн сум акча бүленгән.

Авылда яшәүчеләрнең тормыш шартлары да елдан – ел яхшыра, яңа мәдәният йортлары, ФАПлар, участок инспекторлары өчен йортлар төзелә. Авыл хуҗалыгының үсеше өчен дә күп төрле ярдәм күрсәтелә. Авылда яшәү, эшләү уңайлы, файдалы була бара.

Район һәм шәһәр тормышы белән кыскача таныштырганнан соң журналистлар район башлыгына үзләрен кызыксындырган сорауларны бирделәр.

Россиягә кертелгән санкцияләрнең эчке базар һәм товар җитештерүдә чагылышы

Мәҗит Салихов: Россиягә карата кулланылган санкцияләр нәтиҗәсендә бөтен субъектлар да үз товар җитештерүчеләренә игътибарны арттырачак. Әлмәт муниципаль районында 125 мең гектар (90 меңе сөрү җирлекләре) җир исәпләнә. Хәзерге вакытта төрле формада хуҗалык алып баручы 26 авыл хуҗалыгы предприятиесе эшли. Үзебезне авыл хуҗалыгы продукциясе белән тәэмин итү мөмкинлегебез бар. Соңгы берничә ел эчендә генә дә авыл хуҗалыгына 1 млрд сумнан артык инвестиция кертелгән.

Әлмәтнең чистарту корылмаларын модернизацияләү

Мәҗит Салихов: Бу сорауны безгә еш бирәләр. Дөрестән дә, олы проблема. 40 ел элек төзелгән корылмаларның бүгене көн таләпләренә җавап бирә алмавы аңлашыла да. Проблеманы хәл итү юллары Россия Федерациясе җитәкчелеге югарылыгында хәл ителә. Модернизацияләү проекты инде әзер.

Әлмәткә Украинадан килүче гражданнарга шартлар тудырыла

Мәҗит Салихов: Бүгенге көндә Украинадан Әлмәткә 180 кеше кайтты, аларның берсе дә качак статусын рәсмиләштермәгән, ләкин бу мөһим түгел. Әлеге сорауларны кыска вакытларда хәл итү өчен башкарма комитеты җитәкчесенең беренче урынбасары Николай Богданчиков рәислегендә махсус штаб төзелде. Ихтыяҗ булса, без аларны торак һәм эш белән тәэмин итәргә әзер. Килгән гаиләләргә фатир бирергә әзер булган авыл хуҗалыгы предприятиеләре дә бар.

Муниципаль районның депутатлар корпусы киләсе елга нинди эшләр планлаштыра

Мәҗит Салихов: Районда халык белән аралашуның интерактив челтәре, территориаль советлар белән элемтә һәм башкалар юнәлешләр киң үсеш алган. Кешеләр әлеге сайтлар аша үзләрен борчыган сорауларны җиткерәләр. Халыктан килгән наказлар нигезендә депутатлар корпусының эш программасы формалаша. Әйтеп узганымча, яңа чистарту корылмаларын төзү- көн кадагындагы беренче сорау. Мөһимлеге буенча икенче сорау, яңа микрорайоннарны иҗтимагый транспорт белән тәэмин итү. “Татнефть” ААҖ ярдәме белән троллейбус линиясе ачу өчен шартлар булдырылды инде, киләсе елга яңа микрорайоннардан да тоткарлыксыз йөрү мөмкин булачак. Бүгенге көндә 1,5 - 2 яшьлек 2 меңнән артык бала бакчага электрон чиратта тота. 3-7 яшьлекләр урыннар белән тәэмин ителгән. Бу юнәлештә эш дәвам итә. Депутатлар корпусының эш программасына шәһәр һәм район өчен кирәкле башка мөһим объектлар да кертелгән. Якын киләчәктә “ Көнбатыш капка” микрорайонында яңа мәктәп, “Дуслык” та балалар бакчасы һәм башлангыч мәктәп салу күздә тотыла. “Яшьлек” микрорайонында “Татнефть” ААҖ актив эш алып баруы нәтиҗәсендә барлык социаль объектлар да тулы көченә эшли.

Торак – коммуналь хуҗалык четрекле өлкә

Мәҗит Салихов: Торак – коммуналь хуҗалыкның нәтиҗәлелеген арттыру, андагы закон бозуларны кисәтү максатыннан бу өлкәдә координацион совет төзелгән иде. Бу чыннан да проблемалы, четрекле өлкә. Комиссиянең секретаре, минем киңәшчем Ансель Рахманкуловның грамоталы эш алып баруы нәтиҗәсендә күп кенә мәсьәләләрне хәл итәргә мөмкин булды.
Матбугат конференциясендә Бөек Җиңүнең 70 еллыгына әзерлек белән бәйле сораулар да чагылыш тапты. Район башлыгы Мәҗит Салихов юбилейлары булмаса да, ветераннарны туган көннәрендә шәхсән үзе тәбрикләргә тырыша. Бүгенге көндә районда 195 ветеран яши һәм аларның һәрберсе игътибар үзәгендә.
Әлмәт нефтьчеләр башкаласы гына түгел, спортчылар шәһәре дә. Биредә 52 спорт төре буенча актив шөгыльләнү мөмкинлеге бар. Район башлыгы Мәҗит Салихов үзе дә милли көрәш буенча ТР спорт мастеры титулына ия, әлеге спорт төре буенча соңгы елларда әлмәтлеләргә тиңнәр юк.

 Очрашуда якын киләчәктә келәм батырлары турында китап чыгару турында тәкъдим яңгырады.
Матбугат конференциясе күңелле нотада - Мактау грамоталары һәм дәүләт бүләкләре тапшыру белән төгәлләнде.

Фәрдия Хәсәнова