Музыка колонкаларында наркотик

Курьер алып килгән посылка Казанда яшәүче 22 яшьлек ир-егеткә карата кузгатылган җинаять эшендә матди дәлил булды. ТР наркоконтроль идарәсе оперативниклары хокук бозучыны наркотиклы товар алган чакта тоткарладылар.

Музыка колонкалары музыка тыңлау өчен түгел, ә наркотик матдәләр яшерү урыны булган. Колонкалар эченә оста итеп яшерелгән 100 граммнан артык синтетик наркотиклар сатарга дип җибәрелгән. Тоткарланган наркосәүдәгәр беркайда да эшләми, шулай да 20 яшьлек студентка белән аның әнисенең квартирында рәхәт кенә гомер сөрә. Криминалдан кергән акчаларны бу икәү кием-салымга, күңел ачуга тоткан. Наркотикларга интернет аша заказ биргәннәр, курьерлар квартирларына китергән.

Тоткарланган егет колледжда җәмәгать туклануы сферасында эшләүче технолог булырга укып йөргән. Әмма аңарга укуын дәвам итәргә туры килмәс инде, зур күләмдә наркотик матдәләр саткан өчен аны 20 елга кадәр ирегеннән мәхрүм итү көтә.