Рөстәм Миңнеханов бу юлы да беренче өчлектә

Константин Костинның гражданлык җәмгыятен үстерү фонды экспертлар төркеме ярдәме белән төбәк башлыкларының дүртенче интеграль рейтингын (ФоРГО) әзерләгән. 14 нче сентябрьдә сайлауларга барачак 30 губернатордан җидесенә рейтинг тискәре динамика күрсәткән.

ТР Президенты Рөстәм Миңнеханов губернаторларның нәтиҗәлелеге рейтингында алдынгы позицияләрне саклый: ул “Бик югары рейтинг” категориясендә Калуга өлкәсеннән коллегасы Анатолий Артамонов белән 2-3 нче урыннарны бүлешә. Исемлекнең башында - Ямал-Ненец автономияле округыннан Дмитрий Кобылкин.

Беренче унлыкта шулай ук – Белгород өлкәсе губернаторы Евгений Савченко (4-5 нче урын), Кемерово өлкәсе губернаторы Аман Тулеев (4-5), Чечня башлыгы Рамзан Кадыйров (6-8), Коми губернаторы Вячеслав Гайзер (6-8), Төмән өлкәсе губернаторы Владимир Якушев (6-8), Воронеж өлкәсе губернаторы Алексей Гордеев һәм Владимир өлкәсе губернаторы Светлана Орлова (9-10).

Иң көчлеләр төркеменнән төшеп калучылар: Түбән Новгород өлкәсе башлыгы Валерий Шанцев, Санкт-Петербург губернаторы Георгий Полтавченко, Самара өлкәсе җитәкчесе Николай Меркушкин, Чукотка автономияле округы җитәкчесе Роман Копин һәм Мәскәү мэры Сергей Собянин.