Төзелешләр киң колач җәйгән чор

Нефтьчеләр каласын төзекләндерү, кварталара территорияләрне кешеләр өчен тагын да уңайлы итү, торган җиребезне матурлау өчен ел саен планлы эш башкарыла. Җирле властьләрнең максаты - әлеге чараларда шул җирлектә эшчәнлек алып баручы барлык оешма һәм предприятиеләрнең катнашуына ирешү, бирелгән средстволарның максатчан һәм тиешле урыннарга юнәлдерелүен контрольдә тоту. 24 июль көнне Әлмәт муниципаль район башлыгы Мәҗит Салихов журналистлар, коммуналь хуҗалык департаменты белгечләре белән берлектә рейд үткәрде. Беренче көнне 17 ТОСка сәяхәт ясадык.

Шәһәрнең үзәгендә урнашкан 9 Б ТОС, аның баш предприятиесе "Әлмәтнефть" идарәсе елның-елында үз биләмәләренә яшәүчеләргә иң уңай шартлар тудыра. Быел биредә кварталара юлларга асфальт җәю, агачлар утырту, чүп савытлары урнаштыру һәм башка төзекләндерү эшләренә 3 млн 600 мең сум акча бүленгән. Район башлыгы "Әлмәтнефть" идарәсенең бу юнәлештә һәрвакыт эшләвен, булдырылган чисталык һәм тәртипне саклау буенча да күпләргә үрнәк булып торуларын билгеләп үтте.

"Татнефть-ХимСервис" карамагындагы 9 А ТОСта беренче эшләрне башкару өчен 1 млн 500 мең сум бирелән. Быел Радищев урамы, 63 нче, 55 А, Киров урамы , 38 нче йорт каршындагы юлларга ремонт ясалачак. Коймалар алмаштырылып кара җир кайтарылачак.

8 А территориаль совет җирләрен төзекләндерүгә -1 млн (баш предприятиесе УПТЖ для ППД), 8 гә 1 млн 500 мең (баш предприятиесе "Әлмәт торба заводы") бирелгән. Агымдагы елда төп игътибар кварталара территория, юлларны ремонтлауга юнәлдерелгән. ТОСларның һәр икесендә дә эш кайный, алар инде төгәлләнү алдында.

"Система-Сервис" идарә итүче компания 1 нче ТОСта 4 млн 500 мең сумлык эш башкарырга планлаштыра. Ленин урамы 89, 93, 97, 101, 105, 109 нчы, Шевченко урамы 96 нчы йортлар янәшәсендәге юлларны норматив хәлгә китерү, тротуарларны төзекләндерү күздә тотыла. Бу биредә яшәүчеләрнең теләкләрен исәпкә алып эшләнә.

16 нчы ТОС ("УТТ-3") үз карамагындагы территория юлларына 800 мең, балалар мәйдачыгына 1 млн сум каралган. 16 А ТОСтагылар да күршеләрдән калышмый. "Нефтегаз" әлеге максатларга 2 млн 200 мең сум бүлеп бирә. Средстволар калган очракта, "Заря" яшүсмерләр клубының тәрәзәләрен пластикка алмаштыру мөмкинлеге бар.

12 А ТОС территориясендә "Татнефть-Энергосервис" идарә итүче компания ярдәме белән зур проектлар гамәлгә куелачак. Микрорайондагы 18 нче мәктәптә кадетлар сыйныфы бар, ә 21 нче мәктәп тулысынча диярлек әлеге юнәлештә тәрбия алып бара. Бөек Җиңүнең 70 еллыгы кысаларында герой-пионерлар истәлегенә махсус кадетлар парк төзелә. Мәктәп каршындагы территориягә агачлар утыртыла, тротуарлар асфальтлана, ут үткәрелә һәм сугыш чоры балаларына стела куела. Алга таба герой-пионерларның сурәтләрен урнаштырып аллея ясау турында да уйлыйлар. Бу кадетлар өчен үзенә күрә бертөрле тәрбия чарасы булачак диләр алар.

Шәһәрнең төрле өлешләрендә урнашкан 5 А, 18 нче, 3 нче, 6 нчы территориаль совет җирлекләрендә дә эш кызу темплар белән алып барыла. Планда каралганнарны 10 көн, ике атна эчендә тулысынча тәмамларга уйлыйлар.

Рейд барышында район башлыгы ТОСларга, ЖЭУларга үз территорияләрендә тәртип урнаштырырга, үләннәрне чабарга, кече формаларны, газ торбаларын, яктырткыч баганаларын буярга, йортларның цоколь өлешен матурларга, корыган, авария хәлендеге агачларны кичекмәстән кисәргә кирәклеген ассызыклап узды.

- Әлмәт шәһәре 36 ТОСка бүленгән, яртысыннан артыгында нефтьчеләр баш предприятие булып санала. Алар шәһәрне һәм кварталара территорияләрне төзекләндерүгә саллы өлеш кертәләр. "Татнефть" ААҖ тарафыннан төзекләндерүгә 50 млн сум бүлеп бирелде. Күп ТОС–ларда бу эш төгәлләнде инде. Болардан тыш завод, төзелеш компанияләре, аерым эшмәкәрләр баш предприятиесе булган ТОСларга 15 млн сумнан артык средство каралган. Татарстан Республикасы Президенты тарафыннан йорт яны территорияләрен төзекләндерүгә бирелгән 30 миллионны да кушсак, шактый саллы сумма чыга. Мөмкинлектән файдаланып, халыкны урыннарда башкарылган хезмәтне тиешенчә бәяләргә, булдырылган матурлыкны һәм чисталыкны ватмыйча сакларга, ТОСлар, баш предприятиеләр мөрәҗәгать иткәндә экологик шимбәләр, чараларда актив катнашырга чакырам. Республиканың иң төзек каласы дигән абруйлы исемне сакларга, аңа лаек булырга кирәк, - диде Мәҗит Салихов журналистларга биргән интервьюсында.

Фәрдия ХӘСӘНОВА
“Альметьевский вестник” газетасы