«Бердәм Россия» сәяси партиясенең депутатлыкка кандидатлар исемлеге ТР Үзәк сайлау комиссиясендә теркәлде

Бүген ТР Үзәк сайлау комиссиясендә аның рәисе Әгъзам Гобәйдуллин җитәкчелегендә чираттагы утырыш узды. “Бердәм Россия” сәяси партиясе ТР Үзәк сайлау комиссиясенә, ТР Дәүләт Советына сайлауларда катнашу өчен, кандидатлар исемлеген тәкъдим иткән иде, бүген шул исемлекне теркәү булды.

Әгъзам Гобәйдуллин хәбәр иткәнчә, V чакырылыш ТР Дәүләт Советына депутатлыкка кандидатларны һәм кандидатлар исемлеген тәкъдим итү һәм теркәү тәмамлануга кадәр бер атна вакыт калды: ул 30нчы июльгә кадәр дәвам итәчәк.

Утырышта 10лап мәсьәлә каралды. Алар арасында, “Бердәм Россия” сәяси партиясенең сайлауларда катнашучы кандидатлар исемлеген теркәүдән тыш, сәяси партияләрнең сайлау алдыннан үткәрелә торган агитацияләр вакытында радио һәм телевизион эфир вакыты буенча жирәбә салу, басма матбугатта агитация материалларының күләме, участок сайлау комиссияләре составы резерв исемлегеннән затларны алу, ТРның Мамадыш районы территориаль сайлау комиссиясе җитәкчесен билгеләү һ.б. бар.

Бүген ТР Үзәк сайлау комиссиясе утырышында киңәш итү хокукы белән “Гадел Россия”, “Яблоко”, “Бердәм Россия” партияләренең төбәк бүлекләреннән вәкилләр катнашты. “Бердәм Россия” партиясе вәкилләре Римма Ратникова, Андрей Кондратьев, Юрий Камалтыновка таныклыклар тапшырылды.

Шул рәвешле, ТР Үзәк сайлау комиссиясе тарафыннан төбәкләрдәге сәяси партияләрнең 10сы теркәлү узган булып санала. Шулай ук бер мандатлы сайлау округларында да кандидатларны теркәү бара. Бүгенге көнгә 480 кандидат теркәлгән, шуларның 260ы − бер мандатлы сайлау округларыннан.