Мошенниклар пенсионерның бөтен акчасын урлаганнар

16 июльдә урамда ике хатын-кыз, пенсиядәге ир-ат янына килеп, үзләрен коммуналь хезмәт эшчеләре дип танытканнар, су счетчигын бушлай алыштыру мөмкинлеге бар дигәннәр. Пенсионерга бу тәкъдим хуш килгән, күп уйлап тормыйча, тегеләрне өенә чакырган. Квартирда хатын-кызлар гел ачылып киткәннәр, абзыйның хәленә кереп, гаилә хәле, балалары, үлемтеккә дип җыйган акчалары турында сорашканнар. Абзый инде хәстәрен күреп куйган булуын, акчалары шкафтагы иске пәлтә кесәсендә саклануын әйткән. Шуннан соң кунакларның берсе алыштырасы счетчикларны күрсәтергә әйткән, икенчесе ниндидер документлар тутыра калган. Әмма берничә минуттан кызлар кисәк кенә җыенганнар да чыгып киткәннәр.

Пенсионер акчаларын югалтуын тиз генә белмәгән. Берничә сәгатьтән соң гына, хатын-кызларның сәер гамәлләре хакында уйлангач, җыйган акчасының бармы-юкмы икәнен караган. Юк икәнен белгәч тә әле полициягә хәбәр итәргә ашыкмаган, кызының кайтканын көтеп, аның белән киңәш итәргә булган: үзенең сүзләренә караганда, гаепсез кешеләргә гаеп тагудан курыккан. Нәтиҗәдә алданган пенсионер полициягә бер тәүлектән соң гына хәбәр иткән. Хәзер мошенникларның фотороботы ясалды, аларны эзләү бара. Җинаять эше кузгатылды.

Оператив мәгълүматларга караганда, быел май башында Владимир өлкәсендә дә шунды җинаять булган икән. Су исәбен алу приборлары куябыз дип, мошенниклар 83 яшьлек абзыйның квартирына кергәннәр, хуҗаның игътибарын читкә юнәлтеп, 300 мең сум акчасын урлаганнар.

Фотороботта сурәтләнгән хатын-кызларны белүче кешеләрнең 32-62-32 яки 02 телефоны аша хәбәр итүен үтенәбез.