Марат Гыйрфанов сугыш ветераннарын туган көннәре белән котлады

Бөек Ватан сугышы ветераннары Илья Поляков һәм Вәли Рәхимов туган көннәрен бәйрәм итәләр.

Башкарма комитет җитәкчесе башта туган көнен федераль программа белән бирелгән яңа квартирда каршылаучы Илья Поляковны котлады. Илья Александрович сугышка 1943 елда китә. Ерак Көнчыгыш фронтында Япониягә каршы сугышта катнаша. Миномет полкында төзәүче булып хезмәт итә, аннары ефрейтор званиесендә орудие командиры була. Кореяне азат итүдә катнаша, 1950 елда демобилизацияләнә. Сугыштан соң “Заря” колхозында ферма мөдире булып эшли, шуннан пенсиягә чыга.

Вәли Рәхимовка 13 июльдә 91 яшь тулды. Үзенең бәйрәмен ул балалары, оныклары, аларның балалары арасында каршылый. Бөек Ватан сугышы башланганда Вәли Солтан улына 18 яшь була. Фронтка 1942 елда китә, Воронеж, Калининград шәһәрләре тирәсендә сугышларда катнаша, өлкән сержант була. 1943 елда авыр яра алганнан соң демобилизацияләнә.

Сугыштан соң Вәли Рәхимов китапханәчеләр техникумын тәмамлый, Югары Мактама, Түбән Мактама авыл советларына җитәкчелек итә. Габдрахман авылы мәктәбендә физрук булып эшли. Югары Мактама мәктәбенә кайтып, физкультура укытучысы булып эшләгән җиреннән лаеклы ялга китә.

Марат Гыйрфанов ветераннарны шәһәр һәм район җитәкчелеге, район башлыгы Мәҗит Салихов исеменнән туган көнәре белән тәбрикләде, сәламәтлек, озын гомер теләде.