Осталарны сынау куркытмый

Эшче һөнәренең абруен арттыруда төрле югарылыкта уздырылган ярышлар мөһим роль уйный. Әлмәт муниципаль районында һөнәри осталык бәйгеләре уздыру күп еллар дәвам итүче күркәм традиция.

Шәһәрнең төрле төзелеш объектларында ташчылар, эретеп ябыштыручылар, балта осталары, плитә ябыштыручылар һәм башка белгечләр үзара көч сынашып, осталыкларын чарлыйлар. Быелгы ярышлар 9 июльдән башланып 15енә кадәр дәвам итәчәк.

10 июль көнне "Арслан" җәмгыяте төзи торган "Яшьлек" микрорайонындагы 9 катлы йортның 5 нче подъездында плитә ябыштыручылар бәйгесе булып узды. Ярышларны уздыру комиссиясе рәисе "ГлавУКС" муниципаль учреждениесе смета бүлеге җитәкчесе Гүзәлия Маннанова сүзләренә караганда, эш сезоны кызу барганлыктан, быелгы ярышларда катнашучылар саны чагыштырмача аз, ләкин бу бәйгенең сыйфатына йогынты ясамый.

Плитә ябыштыручылар бәйгесендә "Арслан" фирмасыннан бер команда булып Хафизов Ришат, Осадчий Игорь, "АРСУ"дан Таҗетдинова Лилия һәм Мәрдәншина Эльвира катнаштылар.

Положение буенча бәйге теоретик өлештән башланды. 20 сорауга җавап бирү өчен 15 минут вакыт бирелде. Катнашучылар технологияне, кулланылышка кергән яңа ысулларны ни дәрәҗәдә белүләрен расладылар.

Ярышлар башланганчы командалар эш урыннарын барлап, кирәкле коралларын, материалларны әзерләп куйдылар. Төп максатлары - ике фатирның санузелына кыска вакыт эчендә сыйфатлы итеп плитәләр ябыштыру. Чисталык, куркынычсызлык таләпләре, кулланылган келәй күләме дә комиссия әгъзалары тарафыннан игътибарга алынды.

Бәйгенең практик өлешен башкару өчен дә бер сәгать вакыт бирелде. 45 минут эчендә үзләренә тапшырылган эшне башкарып "Арслан" җәмгыятеннән Ришат Хафизов белән Осадчий Игорь командасы беренче урынга чыкты. "Нәтиҗәләре нинди генә булмасын, мондый чараларда катнашу үзеңне сынарга, өйрәнергә, башкалардан үрнәк алырга бер старт булып тора" - диләр алар. "АРСУ"дан Лилия Мәрдәншина, мәсәлән, ярышларда инде берничә ел катнаша. Ул үз бригадасында иң тәҗрибәлеләрдән санала, эш стажы 20 елдан артык.

Фәрдия Хәсәнова