Эш эзләгәндә мошенниклар кармагына эләккән

25 яшьлек ир-егет, түләүсез белдерүләр сайтының берсендә шәһәр хакимиятенә ашыгыч рәвештә шоферлар алулары турында белдерү укып, тиз генә телефоннан шылтыраткан, Виктор Павлович дигән кеше белән элемтәгә кергән. Сөйләшү барышында Виктор Павлович егетне әңгәмәгә чакырган, юл уңаенда чәй янына берәр нәрсә, дөресрәге, торт һәм шампан шәрабе алуын үтенгән. Аферистның үтенечләре моның белән чикләнмәгән, Виктор Павлович ике тапкыр интерентта эшләү өчен кесә телефонына акча салуын да үтенгән, акчасын очрашу вакытында кайтарып бирергә вәгъдә иткән. Нәтиҗәдә мошенникның исәбенә 4500 сум акча өстәлгән. Килеп җиткәч кенә егет үзен утыртканнарын аңлый башлаган, анда да әле, ышанып бетмичә, Виктор Павлович белән тагын сөйләшмәкче булган. Башта аңа өлкә хакимиятенә килергә кирәк, хәзер үк анда көтеп торалар дип әйткәннәр, аннары, бутала башлап, элемтәне өзгәннәр. Шуннан соң инде яшь кеше полициягә мөрәҗәгать иткән.

Күчерелгән акчаны Ростов-Дон шәһәрендә алганнары билгеле булды. Бу уңайдан җинаять эше кузгатылды.

Үткән атнада тагын бер алдарга маташу турында билгеле булды. Мошенниклар 64 яшьлек хатынга, акчасына ия булу өчен, улың авария ясады дип шылтыратканнар. Әмма уяу пенсионер сүзне озайтып тормаган, трубканы куйган.