Фәрит Мөхәммәтшин Чаллыда республика театрлары Сабан туен ачты

Бүген республика театрлары Чаллыда үзләренең сигезенче Сабан туен ачты. Бәйрәмнең мәртәбәле кунаклары арасында Татарстан Республикасы Дәүләт Советы Рәисе Фәрит Мөхәммәтшин, ТР мәдәният министры Айрат Сибагатуллин, шәһәр башлыгы урынбасары Флера Андреева бар иде.

Республика театрлары сабан туе Чаллыда беренче тапкыр үткәрелә, анда Әлмәт, Буа, Минзәлә, Түбән Кама һәм Казанның Г.Кариев һәм Г.Камал исемендәге театрлары, “Әкият” курчак театры һәм Чаллы театры артистлары килде.

Россиядә һәм Татарстанда Мәдәният көннәренә зур игътибар бирелә. Мәдәният – киң мәгънәгә ия: сәхнә культурасы, театр культурасы, музыка культурасы, тел культурасы, сөйләм культурасы, һәр кешенең эчке культурасы. Сезнең белән безнең бурыч – сәхнә, спектакльләр аша күп милләтле халыкның, татар халкының гасырлар дәвамында буыннан буынга күчә торган иң яхшы традицияләрен һәр кешегә җиткерү”, - диде Фәрит Мөхәммәтшин бәйрәмне ачып.

Флера Андреева шәһәр мэры исеменнән һәм үз исеменнән фестивальдә катнашучыларны һәм кунакларны сәламләде. “Чаллы мәйданында беренче тапкыр театрлар Сабан туе үткәрү – ул сезнең талантыгызга тагын бер тапкыр соклану мөмкинлеге. Сезгә яхшы кәеф телим һәм театрларыгыз тамашачылар белән тулып торсын”, - диде ул.

Театрлар Сабан туе – бу үзенчәлекле чара, анда танылган мәдәният һәм сәнгать эшлеклеләре катнаша. Бүген Чаллыда бәйрәм мәйданында концерт номерлары традицион спорт ярышлары белән чиратлашып барды. Биредә чын Сабан туендагы кебек милли көрәш тә булачак.

Сабан туена хас бөтен уеннар, конкурслар да узачак. Бәйрәмнең төп бүләге – автомобиль, шулай ук башка кыйммәтле бүләкләр.

Республика театрлары арасында Сабан туе 2005 елдан бирле үткәрелә. Беренчесе Биектау районы Әлдермеш авылында узды. Шул вакыттан бирле Татарстан театрлары коллективлары ел саен Сабан туена җыела.