Шәфкатькә нигезләнгән һөнәр ияләре бәйрәме

“Нефтьче” мәдәният сараенда тантаналы рәвештә Медицина хезмәткәре көне билгеләп үтелде. Ул ӘМР сәламәтлек саклау идарәсе һәм “ЛУЧ-Әлмәт” телекомпаниясе әзерләгән “Табибларга гимн” белән башланып китте.

Зал медицина хезмәте ветераннары, Бөек Ватан сугышында катнашкан Мәрьям Хәйретдинова белән Елена Пряхинаны аягурә басып хөрмәтләде.

Әлмәт районы башлыгы Мәҗит Салихов, медицина хезмәткәрләрен сәламлләп, аларга кыен һәм мактаулы хезмәтләре өчен рәхмәт сүзләре әйтте, үткән елда ТР президенты һәм хөкүмәте, сәламәтлек саклау министрлыгы белән тармакны үстерү өчен күрелгән мөһим чараларны телгә алды.

Райондагы дәвалау-профилактика учреждениеләренең материаль-техник базасын ныгытуга, аларны ремонтлау һәм реконструкцияләүгә, белгечләрнең укуын максатчан финанслауга “Татнефть” ААҖ даими булышлык итә.

Район башлыгы иң яхшы коллективларга һәм хезмәткәрләргә күпьеллык намуслы хезмәтләре өчен ӘМР советы һәм башкарма комитетының Мактау грамоталарын тапшырды.

Бәйрәмнең хөрмәтле кунагы, ТР сәламәтлек саклау министры урынбасары Ринат Җәләлетдинов үзенең котлау сүзендә “Әлмәт районы республика өчен стратегик партнер булып тора” дип белдерде, коткарып калынган тормышлар өчен аеруча рәхмәт сүзләре җиткерде. Ул РФ һәм РТ сәламәтлек саклау министрлыкларының Мактау грамоталарын тапшырды. Берничә матбугат органының редакцияләре, ӘМР башлыгының матбугат хезмәте министрлыкның рәхмәт хатларына лаек булды.

ӘМР сәламәтлек саклау идарәсе башлыгы Равил Хәйруллин үткәрелә торган чараның кадерле ветераннарга иң җылы теләкләр җиткерү өчен бик әйбәт форсат булуын искәртте, бүгенге ирешелгәннәрдә аларның өлеше зур булуын билгеләп үтте.