Әлмәт районының Яшьләр бистәсендә экологик семинар үтте

Бүген Әлмәт муниципаль районының Яшьләр бистәсендә экологик шартларны яхшыртуга багышланган традицион семинар-киңәшмә булды.

Семинарда район башлыгы Мәҗит Салихов, шәһәр башкарма комитеты җитәкчесе Николай Богданчиков, предприятие, оешма, ведомство, уку йортлары, учреждениеләр җитәкчеләре, авыл башлыклары һ.б. катнашты.

Семинарда катнашучыларга экскурсия оештырып, ирешкән казанышлар белән таныштырдылар. Кунаклар балалар бакчасында булдылар, мәктәп мәйданчыгында балалар сабантуен карадылар, фермер хуҗалыклары, халык иҗаты күргәзмәсе белән таныштылар. Кунакчыл авыл кешеләре килүчеләрне үз баллары, шифалы үләннәр салып пешергән чәй, таба ашлары белән сыйладылар.

Пленар өлеш шәһәрдә һәм районда үткән экологик икеайлыкка йомгак ясаудан башланды. Аның нәтиҗәләре белән Экология һәм табигатьтән файдалану департаменты җитәкчесе Илдар Зиннәтуллин таныштырды.

Проблемалар турында да сүз булды. Иң зур проблемаларның берсе – чистарту корылмалары, алар искергән, бүгенге таләпләргә җавап бирми. Реконструкция ясау өчен бик зур сумма – миллиард ярым сум акча кирәк. Кәләй авылындагы чистарту корылмаларын да алыштырырга вакыт. Бу 9 миллион сумнан артыгракка төшәчәк.

Кайбер авылларда үләт базлары тәртипкә китерелмәгән, терлекләр тиешсез урыннарда көтелә. Кайбер авыл җитәкчеләре чүп-чарны вакытында төяп озхату турында тиешенчә кайгыртмый. Икенчел чимал кабул итү темасы да кузгатылды. Семинарда катнашучылардан байтак сораулар һәм тәкъдимнәр керде. Мәҗит Салихов аларны игътибарга алырга яки чарасын күрергә кушты.

Елдагыча, чара ахырында “Эколидер” конкурсында җиңүчеләргә бүләкләр тапшырылды, аннары семинарда катнашучылар чишмә янында укучылар белән агачлар утырттылар.