Әлмәтлеләр Латвиядә Европада беренче сабан туе үткәрделәр

7 июньдә Латвия башкаласы Ригада Европада беренче сабан туе гөрләп үтте. Татарстан президентының кушуы белән Евросабантуйны оештыру һәм үткәрү өчен республикадан җаваплы куратор итеп Әлмәт районы билгеләнгән иде. ӘМР башлыгы Мәҗит Салихов җитәкчелегендә зур делегация Латвия татарларына булышлык күрсәтү өчен алдан ук юлга чыкты.

Хәзер Ригада 3 меңнән артык татар яши. Асылда бу сабан туе Балтик буенда исәп белән 10нчысы инде. Әмма Европа статусында беренче тапкыр үтә. Бу көнне Риганың Верман бакчасына милләтәшләребез Европаның 11 иленнән җыелган иде.

Европа сабан туен ачуда ТР Югары Советы рәисе Фәрит Мөхәммәтшин катнашты. Ул урындагы җитәкчеләргә сабан туе үткәрүдә ярдәм күрсәтүләре өчен рәхмәт әйтте, ТР президенты Рөстәм Миңнехановның сәламләү хатын укыды. Үз чиратында Рига мэры Нил Ушаков Латвия президенты Андрис Берзиньшның сәламләвен укыды, Мәҗит Салиховка ихтирам билгесе итеп Рига күренешләре төшкән истәлекле карта бүләк итте.

Латвиядәге татар җәмгыятенең актив вәкилләренә ТР президентының рәхмәт хатлары тапшырылды.

Евросабантуй сәхнәсендә “Әлмәтем” бию ансамбле, “Кәләем” халык фольклор ансамбле чыгыш ясады. Әлмәт татар драма театры артистлары бөтен традицияләре, йолалары белән милли бәйрәмнең атмосферасын тудырдылар.ТР халык артисты Ренат Ибраһимовның чыгышы бәйрәмнең затлы бизәге булды.

Сабан туе булгач, әлбәттә, борынгыдан килгән ярышлар үзәктә иде. Рига мэры үзе дә чүлмәк ватарга чыкты.

Шунысын искәртик, Ригада Европа сабан туен әзерләү һәм үткәрүдә Әлмәттә бик күпләр катнашты. Иң зур ярдәм күрсәтүче “Татнефть” компаниясе булды. Нефтьчеләр вәкиле булып Евросабантуйга компаниянең профком рәисе Гомәр Яруллин барды.