Кама-Исмәгыйль сабан туен бәйрәм итә

Кама-Исмәгыйльдә берничә ел элек сабан туе өчен махсус мәйдан җиһазлаганнар иде. 8 июньдә шунда авыл хезмәтчәннәре чираттагы тапкыр бәйрәм үткәрергә җыедылар. Бәйрәмдә Әлмәт районы башлыгы Мәҗит Салихов катнашты. Үзенең чыгышында ул бүген татар халкының иң яраткан һәм көтеп алган бәйрәме булуын әйтте.

“Без язгы кыр эшләрен әйбәт төгәлләдек, - диде район башлыгы. – Хәзер яңгыр көтәсе генә калды”, - дип авыл кешеләренең бүгенге иң зур борчуын телгә алды. Ул авыл халкын бәйрәм белән тәбрикләде, уңышлар һәм иминлек теләде.

Традиция буенча сүзне авыл аксакалы Мөнир ага Фатиховка бирделәр. Тукайның “Җил дә вакытында исеп, яңгыр да вакытында ява” дигән сүзләрен искә төшереп, аксакал игеннәр өчен әйбәт һава хәлләре булуын теләде. Сабан туен аксакал Коръәннең әл-Фатиха сүрәсе белән башлап җибәрде.

“Чагылтау” хуҗалыгы җитәкчесе Гомәр Нәбиев сабан туеның татар халкының күңел юмартлыгын, кунакчыллыгын чагылдыра торган бәйрәм булуын билгеләп үтте, чиксез зур ярдәмнәре өчен нефтьчеләргә, шәхсән Сергей Соколовка рәхмәт сүзләре әйтте.

Сабан туе флагын күтәрергә механизатор Равил Нуриазданов һәм сыер савучы Гүзәлия Ахунҗанова чакырылды.

Рәсми өлештән соң сабан туеның традицион милли ярышлары – көрәш, ат чабышы, узышу, йомырка кабып йөгерү, капчык киеп йөгерү, багана башына менү һ.б. башланды. Көрәш батырларын ике тәкә һәм кер юу машинасы көтеп тора иде.

Сабан туе кунаклары күңелле ярышларда көч сынаштылар, сәхнәдән үз осталыкларын күрсәттеләр. Болар һәммәсе дә спонсорлар ярдәме, район башлыгы Мәҗит Салихов булышлыгы белән мөмкин булды.