Мәҗит Салихов «Татнефть-РемСервис» ҖЧҖ идарәче компаниясендә булды

Әлмәт муниципаль районы башлыгы Мәҗит Салихов алдынгы технологияләр һәм компаниядә хезмәтне оештыруга яңача якын килүләр белән танышу максатында «Татнефть-РемСервис» ҖЧҖ идарәче компаниясендә булды.

«Татнефть-РемСервис» - шәһәрдәге иң зур предприятиеләрнең берсе, ул нефть скважиналары белән эш итә: агымдагы һәм капиталь ремонт үткәрә, яңа көпшәләр бораулый, катламнарны гидравлик ысул белән ярдыра, нефть чыгаручы һәм су кудыручы скважиналарга стимуляция ясый, химик продукция җитештерә һ.б

Компаниянең баш офисы һәм җитештерү объектларының бер өлеше шәһәр үзәгенә якын Производственная урамында урнашкан. Биредә, шуның өстенә “Әлмәтнефть” идарәсенең нефть скважиналары эшләп торуга карамастан, чиста, тәртип. Былтыр “Татнефть” ААҖ Производственная урамын төзекләндерүгә 30 миллион сумлап акча тотты.

Компания белән аның директоры Айрат Закиров таныштырып йөрде. Аның составына 6 предприятие керә, 4,5 меңләп кеше эшли, шуларның 2 меңгә якыны Әлмәт районында.

Район башлыгына уникаль техника белән җиһазланган эш участокларын, башка предприятиеләрдә төрдәше булмаган профилактикага өйрәтү мәйданчыгын, барлык объектларга таралган видеорегистрация системасын һ.б. күрсәттеләр.

Район башлыгы экскурсия өчен рәхмәт әйтте, җитәкчеләр адресына соклану сүзләре җиткерде. “Эш урыннарының оештырылу дәрәҗәсе, җитештерүгә якын килү осталыгы, һәр белгечнең ни дәрәҗәдә әзерлекле булуы миңа ошый, - диде ул. – Биредә дөньяда булган барлык алдынгы технологияләр кулланыла. Мондагы тәҗрибәне башка предприятиеләрнең җитәкчеләренә дә өйрәнергә кирәктер. Шул исәптән бюджет өлкәсендә дә”.