Әлмәт районында экологик икеайлык тәмамланды

1 апрельдә башланган экологик икеайлыкның тәмамлануы турында гомумшәһәр планеркасында бүген Экология һәм табигатьтән файдалану департаменты җитәкчесе Илдар Зиннәтуллин хәбәр итте. Икеайлык барышында 8 санитария җомгасы булды, 26 апрельдә һәм 17 майда район һәм шәһәр шимбә өмәләре оештырылды.

Икеайлык барышында уку йортлары шәһәргә керү юлларын, чишмәләрне һәм беркетелгән яшел зоналарны чистарттылар, 133 берәмлек техника эшләде, 107 машина чүп төяп озатылды. Җыештыруда барлыгы 7157 студент катнашты.

Мәктәпләр һәм мәктәпкәчә яшьтәге балалар учреждениеләре үз тирәләрендәге территорияне тәртипкә китерделәр, 49 берәмлек техника тартылды, 41 машина чүп чыгарылды. Квартал эчләрен чүптән арындыруда идарәче компанияләр, территориаль үзидарә советлары зур эш башкарды.

Шәһәр предприятиеләре һәм учреждениеләре үз тирәләрен, юл буйларын җыештырдылар, бордюрларны буядылар, агарттылар, агач кәүсәләрен акладылар. Икеайлыкта предприятиеләрнең 15587 кешесе катнашты.

Авыл кешеләре дә зур хезмәт куйдылар, зиратларны, якын-тирәне җыештырдылар, юл буйларын, чишмәләрне чистарттылар. 3880 кеше катнашып, 106 машина чүп төяп җибәрелде.

Экологик икеайлык дәвамында анда барлыгы 59090 кеше катнашты, 1152 машина чүп озатылды.

Шәһәрнең чисталыгына “Татнефть” ААҖ зур игътибар бирде, нефтьчеләр җыештыру эшләрен тәүлек буена сменалап башкардылар.

Шәһәрне төзекләндерүгә бәйле чаралардан зур диаспоралар да читтә калмады.

10 июньдә Яшьләр бистәсендә семинар-киңәшмә була, анда Әлмәт муниципаль районында экологик хәлне яхшырту мәсьәләләре каралачак.