Татарстанда халыкның юл-транспорт һәлакәтләреннән үлем дәрәҗәсе кимү билгеләнелә - ТР Сәламәтлек саклау министрлыгы

Хәзерге вакытта Татарстанда халыкның юл-транспорт һәлакәтләреннән үлем дәрәҗәсе кимү билгеләнелә. Бу елның 4 аенда үлем күрсәткече 100 мең халыкка 10 булды, бу үткән ел дәрәҗәсеннән 22,5 процентка кимрәк. Шул хакта  ТР сәламәтлек саклау министрының беренче урынбасары Серей Осипов хәбәр итте.

Аның сүзләренчә, һәлакәтләр медицинасы һәм ашыгыч ярдәмнең дежур-диспетчер хезмәте гамәлләрен координацияләү ашыгыч ярдәм бригадаларының юл-транспорт һәлакәтенә килү вакытын кыскартты. Үткән ел нәтиҗәсе буенча, ул уртача 14,3 минут булган (норма - 20). Очракларның 25 процентында ашыгыч ярдәм бригадалары юл-транспорт һәлакәте урыннарына ЮХИДИ хезмәткәрләреннән алдарак килә.

ТР сәламәтлек саклау министры Гадел Вафин ашыгыч ярдәм бригадаларының һәлакәт урынына килү вакынының яхшы нәтиҗәләрен билгеләп үтте. Ул шулай ук ассызыклап үткәнчә, медицина белгечләрен укытуны, аеруча юл-транспорт һәлакәтләрендә эшли торган фельдшерларны укытуны дәвам итәргә кирәк.

“Якынча 150 фельдшерны без укыттык, аларның һәрберсе бу курсларга югары бәя бирде. Быел без 7 нче клиник хастаханә һәм Яр Чаллының ашыгыч медицина ярдәме хастаханәсендә ача торган укыту үзәкләрендә 60 медицина хезмәткәре уку узарга тиеш. Бу укыту системасы даими булыр дип уйлыйм”, - диде ул.

С.Осипов сөйләгәнчә, трассалардан транспорт һәлакәтендә зыян күргәннәрне эвакуацияләү өчен, Яшел Үзән районы Исак авылында, Балык Бистәсе районы Котлы-Бөкәш авылында, Яр Чаллының ашыгыч медицина ярдәме хастаханәсе янында 3 вертолет мәйданчыгын төзү планлаштырыла.

«Татар-информ»