Габдрахман авыл мәдәният йортының “Сәрбиназ” халык ансамбле Астраханьда

Астрахань өлкәсендә 23-25 майда “Идел буе халыкларының мәдәни мирасы” дигән этник мәдәниятләр фестивале булды.

Фестивальдә Мордовия, Марий Эл, Татарстан, Калмыкия республикаларыннан, Түбән Новгород, Волгоград һәм Саратов өлкәләреннән этник музыка башкаручы фольклор ансамбльләре катнашты. Татарстан Республикасы вәкиле булып Әлмәт районы Габдрахман мәдәният йортының “Сәрбиназ” халык вокаль ансамбле барды.

Идел буе районының нигездә Астрахань татарлары яши торган Татар Башмагы авылында “Сәрбиназ” ансамбле бер сәгать дәвамында концерт куйды. Шуннан соң ансамбль быел көз көне Астрахань өлкәсендә булачак Татар мәдәнияте фестиваленә чакыру алды. “Сәрбиназ” тамашачыларны кубызларда уйнавы белән әсир итте.

Татарстан Республикасыннан килгән бердәнбер коллектив буларак, “Сәрбиназ” ансамбле татар халкының милли мәдәниятен зур горурлык белән күрсәтте, югары башкару осталыгы һәм фестивальдә актив катнашуы өчен Астрахань өлкәсе мәдәният министрлыгының дипломы белән бүләкләнде.

“Сәрбиназ” фольклор ансамбле фестивальгә баруны оештырган өчен ТР Дәүләт Советы депутаты Шәфәгать Тәхәветдиновка чиксез рәхмәтле.