Әлмәт журналистлары матбугат көнен билгеләп үттеләр

Әлмәт журналистлары музыка көллиятендә Татарстан Республикасы матбугат көнен билгеләп үттеләр. Шәһәрдә рус һәм татар телләрендә 30дан артык матбугат чарасы эшли. Алар хакимият белән халык арасында нәтиҗәле арадашчылык функциясен башкаралаар. Бүген нинди дә булса социаль-икътисади башлангычны яки яңа проектлар гамәлгә ашыруны журналистлардан башка күз алдына китерү дә кыен.

Район башлыгының урынбасары Наҗия Хәйдәрова ӘМР башлыгы исеменнән журналистика ветераннарын, эшләп торучы каләм осталарын һөнәри бәйрәм белән тәбрик итте. Ул аларның эшен югары бәяләде, ӘМР советы һәм башкарма комитетының Почет грамоталарын, рәхмәт хатларын тапшырды.

Татарстан матбугаты көне белән матбугат хезмәткәрләрен ТР Дәүләт Советы депутаты, Әлмәт хатын-кызлар берлеге җитәкчесе, Әлмәт музыка көллияте директоры Гүзәл Еремеева һәм “Татнефть” компаниясенең матбугат хезмәте вәкиле Марат Бәдретдинов та тәбрикләде.

Шунда ук “Знамя труда” гәзите редакциясе тарафыннан оештырылган “Популяр журналист” конкурсына да йомгак ясалды.