Әлмәт студенты Чехиядә Selet Prague School республика проектлы укыту программасында катнашты

3-17 майда Чехия Республикасында Selet Prague School республика проектлы укыту программасының чираттагы икенче этабы үтте. Анда Әлмәт дәүләт нефть институты студенты Энҗе Хәйруллина катнашты.

Бөтен Татарстаннан барлыгы 40тан артык фикердәш Прагадагы “Сәләт” мәктәбендә катнашты. Программа кысаларында студентлар Прага һәм Венаның (Австрия) яшьләр берләшмәләрендә булдылар, аларның оешу, эш тәҗрибәсе белән таныштылар. Шулай ук Дрезден шәһәренә (Германия) экскурсиягә дә барып кайттылар.

Прага “Сәләт” мәктәбе ул – формаль булмаган белем алу өлкәсендә алдынгы технологияләрне эченә алучы проектлы программа. Анда катнашучылар яки оештыручылар юк, фикердәшләр генә. Бу программаның төп максаты – Татарстан Республикасының позитив үсеше өчен новаторлык проектлары булдырырга ярдәм итү.

Шушы елның 8 июнендә Казанда “Сәләт” мәктәбендә катнашучыларның проектны оештыручылар белән очрашуы була, анда егетләр-кызларга сертификатлар тапшырылачак.