Толерантлык гамәлдә: Иске Суркино гөрләп яши

“Толерантлы Татарстан: Әлмәт муниципаль районының Иске Суркино авылы мисалында милләтара тынычлык һәм татулыкның чыганаклары һәм үсү шартлары” – Иске Суркино авыл җирлеге советы һәм ТР Журналистлар берлегенең Әлмәт бүлеге оештырган чараның рәсми атамасы шундый иде.

Кояшлы матур көндә шәһәр журналистларының күчмә семинары авыл кешеләренең хөрмәтләп кабул итүе аркасында чын бәйрәм кебек булды. Авыл мәдәният йорты каршында кунакларны милли киемнәр кигән башкаручылар хоры каршы алды, зур коллективта кече яшьтәге мәктәп балаларыннан пенсионерларга кадәр җыелган иде. Аларның төрле музыка коралларына кушылып чуаш җырларын башкаруын кунаклар рәхәтләнеп тыңлады.

Журналистлар зур авыл буйлап экскурсия ясадылар, экскурсоводлары авыл башлыгы Инна Альмукова үзе булды. “Хузангай” чишмәсе янында кунаклар авыл кешеләре бәлән әйлән-бәйлән уйнадылар, “Учук” чишмәсе янында аларга чуаш халкының борынгыдан килгән мәҗүсилек йоласын күрсәттеләр, балалар бакчасында нәниләрнең чыгышын сокланып карадылар.

Аннары журналистлар бераз көрәк тотып эшләп тә алдылар: мәдәният йорты янында өлкән сыйныф укучылары белән алмагачлар утырттылар, Дуслык бакчасына нигез салдылар.

Пленар өлештә журналистлар мастер-класс үткәрделәр. “Татарстан – Яңа гасыр” телереадиокомпаниясенең корпункт җитәкчесе Фоат Гайсин телевидение чаралары белән толерантлык тәрбияләү турында сөйләде, “Знамя труда” гәзитенең баш редакторы Сәрия Исхакова хәзерге шартларда гәзит эшен оештыру, гәзитнең кәгазь һән онлайн-версияләре белән таныштырды.

Семинар эшендә Татарстан халыклары ассамблеясе вәкилләре катнашты, алар муниципаль хакимият вәкилләре белән бергә “Толерантлы Татарстан: республикада милли сәясәтне гамәлгә ашыру” дигән темага түгәрәк өстәл ясадылар.

Берничә журналистка ТР халыклары ассамблеясенең Мактау грамоталары тапшырылды.

Иске Суркино авылы мисалында журналистлар үзләре күргәнчә, Татарстан Республикасында милли сәясәтне гамәлгә ашыру матур җимешләр бирә, башлыча чуашлардан торган авыл халкы тулы тормыш белән яши.