Истәлегем булып калсын өчен//Җыр сүзеннән һәйкәл салам әле

Моннан күп еллар элек язылган әлеге шигырь юллары Энҗе Мөэминованың тууына 90 ел тулганда чынбарлыкка әверелде. 16 май көнне Габдрахман авылы урта мәктәбе бинасына танылган шагыйрә, 20 дән артык китап авторы Энҗе Мөэминовага исемен мәңгеләштереп мемориал такта куелды.

Чарада Әлмәт муниципаль районы башлыгы Мәҗит Салихов, ТР Язучылар берлеге рәисе Рәфис Корбанов, ТР Дәүләт Советы депутаты Шәфәгать Тәхәветдиновның ярдәмчесе Рөстәм Гарипов, Габдрахман авылы җирлеге башлыгы Өлфәт Усманов, ветераннар советы вәкилләре, шагыйрәнең якыннары, иҗатчылар, укытучылар һәм укучылар катнашты.

-Без үз җирлегебездән Энҗе Мљэминова кебек шәсхесләр чыгуына чиксез горурланабыз. Әлеге буын кешеләре бернинди авырлыкларга да карамастан хезмәт иткәннәр, татар әдәбиятының алтын фондына керерлек әсәрләр иҗат иткәннәр. Шагыйрәнең шигырьләрендәге фикер киңлеге, күңел түрләренә үтеп керә алырлык фәлсәфә бүген дә аны киң катлам укучыларга кызыклы итә, -диде район башлыгы үзенең чыгышында. Социаль һәм рухи юнәлештәге эшчәнлекне тормышка ашыруда һәрвакыт ярдәм итүләре өчен “Татнефть” ААҖ компаниясенә олы рәхмәт сүзләрен җиткерде.

Мемориал такта ачу тантанасыннан соң Энҗе Мәэминованың якыннары һәм язучылар, ветераннар зиратка барып, аның каберенљ чәчәкләр салдылар. Шагыйрәнең тууына 90 ел тулуга багышланган чара авыл мәдәният йортында әдәби кичә белән тәмамланды.

Фәрдия Хәсәнова, “Альметьевский вестник” газетасы